Shillong, Jylliew 20: Ka All North Eastern Hill University Workers’ Union (ANEHUWU) hynne ka sngi nyngkong kala leit iakynduh ia u Lat ka Jylla Satya Pal Malik uba dei u Chief Rector ka NEHU, bad phah tuklar ha u halor ka jingbym lah jong ki bor pyniaid kane ka skulbah ban thungkam pura noh ia ki nongtrei Casual watla kila dep ai ia ka jingshakri mynta la palat 10 snem.
Hadien ka jingiakynduh ia u Malik, u President ka Union u Napoleon S Mawphniang ula iathuh ha ki nongthoh khubor ba ki don haduh 505 ngut ki nongtrei casual ha Shillong bad Tura Campus jong ka NEHU.
“Kiba bun kila trei mynta la 10 snem hynrei ki bor pyniaid ka NEHU kim pat thungkam pura satia ia ki” ula ong haba bynrap “Ia kine ki nongtrei la siew bainong kaba rit bha mynta la bun bun snem khamtam ki kynthei kiba la duh ruh wat ban shim ia ka shuti armet bad kha khun rit” ula ong.
U Bah Mawphniang ula kynnoh ba ki bor pyniaid ka NEHU kim kwah satia ban sngap ia ki jingeh jong ki nongtrei casual bad bunsien kine ki nongtrei ki ju shah byrngem ruh ban pynduh noh ia ka kam jong ki bad khate ia ka bainong tang namar ka jingiashim bynta ha ka jingiakhih da kaba shong kyllain mungor dang shen jong ka Union.
U Bah Mawphniang ula kynnoh ruh ba ki bor pyniaid kila dep thungkam pura ia ki katto katne ki nongtrei casual kiba dang shu thungkam tang katto katne snem. “Hynrei, kane kajuh ka bor pyniaid kam shym la lah ban thungkam ia ki Nongtrei casual kiba la shakri la palat 10 snem ia ka university” ula ong.
Haba kylli, une u President ula pyntip ba Lat ka Jylla ula kular ia ka kynhun ba un sa rah iakren ia kane ka jingeh jong ki Nongtrei casual bad u Vice Chancellor ka NEHU hashuwa ban shim ia ka rai ba khatduh halor kane ka kam.
