Shillong, Nailar 11: Tang hadien ba ka Meghalaya High Court kala kdat sharud ia ka hukum sospon, u Syiem ka Hima Mylliem Paiem Ainam Manik Syiem ha ka sngi Baar, ula pdiang ia katei ka rai bad kyntu ban don ka jingiatreilang kaba khlain bad ka Khasi Hills Autonomous District Council.
Haba iakren bad ki lad pathai khubor, u Syiem ula ai khublei ia baroh kiba la ai jingkyrshan.
“Nga pynpaw ka jingsngewnguh ia baroh ki bakhraw batri, ki Myntri, Syiem Khynnah, ki nongtrei bad ia u Nongiasaid aiñ uba la rangbah uba la mihkhmat ia nga hadien ba nga lah shah suspon ha ka 22 tarik u Jymmang 2026”.
Halor ka jingrai ka iingbishar, ula ong, “Ka High Court kala pyndam lut ia baroh ki hukum kiba la suspon ia nga kum u Syiem ba pura jongka Hima Mylliem. Ka iingbishar kaba donburom kala pynneh biang ia nga bad kala ai ia ka rai ha ka 11 tarik u Nailar 2026”.
“Kum u Syiem ka Hima Mylliem, nga kwah ban iatreilang bad ka district council bad baroh ki bor kiba dei khmih, ngi donkam ban iatreilang haba ngi iaid shakhmat”.
Haba kren halor ka bhah ne ‘Share’ 1/8 ban siew sha ka KHADC, ula pynshai ba ka Hima kala bteng ban siew watla katei kadei kaba la pynshong nongrim na ka Resolution kaba la shim da ka dorbar ha u snem 1953 hynrei kam shim la dei satia pat ka aiñ.
“Ngi lah ju siew ia ka bhah sha ka district council. Ka bhah kaba 1/8 kadei tang ka Resolution ka dorbar ha u snem 1953 bad kam dei ka aiñ. Hynrei namar ka jingburom, ngi lah bteng ban siew ia ka pisa kumba la leh da ki Syiem kiba mynshwa bad ngi kwah ban don ia ka jingiatreilang kaba iajan hapdeng ka Hima bad ka Council”.
Ula pyniasyriem ruh ia katei kum ka Resolution kaba la mynjur ha kaba iadei bad ka ILP.
“Ia ka Resolution halor ka ILP la mynjur hapoh jong ka aiñ hynrei kam shim la kylla long aiñ pat. Ka bhah 1/8 kadei kaba don ha kajuh hi ka kyrdan, ka dang dei tang ka Resolution kam dei satia ka aiñ”.
Haba kyntu ia ka jingiatreilang kaba iajan, ula ong, “Ngi burom ia ka district council. Kin don beit ki jingduna ha ka jingiadei parabriew, hynrei ngi kwah ia ka jingiatreilang bad ka EC jongka KHADC ban kiar na kino kino ki jingia sngewthuh bakla. Mano mano ruh kiba don ha ka EC, ngi dei ban iatreilang bad ka ophis jong ka KHADC “.
