Shillong, Nailur 19 : U Myntri Rangbah ka Jylla Conrad K Sangma ha ka sngi Ba-ar, ula pdiang sngewbha ia ka rai jong ka Sorkar Pdeng ban buh bhah ba 33 percent ia ki Kynthei ban long kum ki dkhot ka Iingdorbar Parliament bad ki Iingdorbar Thaw Ain jong ki Jylla.
Haba iakren bad ki nongthoh khubor, u Conrad ula ong “Hooid kum ka Jylla ba ai jait sha ka Kmie bad kum u briew uba ngeit ha ka jingpynkupbor ia ki Kynthei, nga da kmen palat halor kane ka Bill bad nga pdiang sngewbha ia kane ka Bill. Nga thikna ba kane kan lam sha ka jingpynkhlain bad jingmihkhmat jong ki kynthei ha Parliament bad Iingdorbar ki Jylla”.
“Kum ka Jylla ruh, ka dei kaei kaei kaba nga thikna ba ka Jylla baroh kan pdiang ia ka namar ka dei kawei na ki katto katne ki Jylla ha ka Ri kaba ngeit ha ka jingpynkup bor ia ki Kynthei ha ka Imlang sahlang da ka lynti ka jingdon ia ka jingaijait Kmie, ka dei ruh shibynta na ka dustur jong ngi” ula ong.
Haba pynpaw ba ka National Peoples Party (NPP) kan sa shim rai shen halor kane ka kam, u Conrad ula ong “Kum ka party, khlem pep ngin sa shim ia ka rai halor ka nongrim jong ngi, ngin sa khot ia ka jingialang bad hadien kane, ngin sa shim ia ka rai. Kum u President ka Party bad kum u briew shimet, ka dei kaei kaei kaba ngi pdiang sngewbha”.
Haba kylli, u Myntri Rangbah ula png “Kane ka dei ka daw balei u Myntri Rangbah Duh ula rai ban wanrah ia kane (Bill) bad kane ka dei kaei kaei kaba ngi la iakren ha ki snem bala leit noh bad mynta bala don ka jingbuh bhah, ka nongrim ka don ia ki kynthei ba kin mih shakhmat bad ong namar kiwei kim pat ban iakhun, ki shynrang kim lah ban iakhun, kumta ki kynthei kin hap ban iakhun bad kane hi ka dei ka jingthmu jong kane ka jingai bhah”.
