Shillong Nailur 19: U Director General ka Border Security Force (BSF) Nitin Agrawal, hynne ka sngi Baar ula wan jurip iaka Meghalaya Frontier BSF bad khmih iaka jinglong jingman bad ia ki jingpynkhreh ha ki thaiñ khappud jong ka ri India bad Bangladesh.
Ha kane ka jingwan jurip ka baar sngi u khlieh jong ki BSF, la pdiang sngewbha da u IG BSF Meghalaya u Pradip Kumar bad kiwei kiwei ki heh ophisar BSF ha ka jingialang kaba la long ha BSF Campus, Umpling.
U IG ka BSF Meghalaya ula baiati bad pynpaw hakhmat jong u Director General ia ka jinglong jingman bad ia ki jingpynkhreh ia ki kam khynra ha ka khappud jong ka India-Bangladesh bad ula pynpaw ruh ia ki jingeh kaba ki mad ha katei ka thaiñ khappud bad iaka jingdonkam ban shim ia ki sienjam ban leh eiei.
U Nitin Agrawal ula iakren bad ki heh ophisar khamtam bad ki Field Commander bad ula iaroh ia ka jingtrei shitom ka jongki shipai BSF kiba ieng ban iada ia u pud u sam jong ka ri bad ban tehlakam ia ki kam sniew ha ki thaiñ khappud.
U DG BSF ula plie ruh iaka Officers’ Institute ha BSF Frontier HQ Umpling.
