Shillong, Nailur 19: Ka nongmihkhmat bala ih haka kam sain hima ka Meghalaya kong Ampareen Lyngdoh, kala pynpaw ka jingsngewkmen halor ka rai jong ka Sorkar Pdeng ban mynjur iaka Women’s Reservation Bill bala mang kyrpang haduh 33% iaki kynthei hapoh ka Lok Sabha bad ha ki ïiingdorbar jylla.
“Nga dap daka jingkmen bad kane kadei ka sngi kmen ia baroh ki riewkynthei hapoh ka ri India bad nga kyrmen ba kane ka ain ka dei naka bynta ki kynthei. Nga kyrmen ba ki ïingdorbar kin ailad iaki kynthei haka sain hima” la ong ka kong Ampareen.
Ka kong Ampareen kala ong ba kam mut ba ki kynthei hapoh Meghalaya kim pat ju jop iaki ilekshon hynrei ka long kaba shisha ba ki kynthei ki shem jingeh ban iakhun pyrshah bad kane ka jingmang kyrpang lypa kan plie lad iaki kynthei ban mih shakhmat ban iakhun ban ioh ka jingithuh kaba kidei ban ioh.
Kala ong ba kam don atia kano kano ka jingduna ki kyrtong kynthei ha Meghalaya. “Ngi dei ki riewkynthei bad ngi dei kiba trei shitrhem ha baroh ki jait kam. Nga phaikhmat ban iohi ia ka jingtreikam jong kane ka Bill bad sngewsih ba kin don katto katne ki rangbah ki ban hap ai noh ia ka kam sha ki kynthei bad kane kan dei kaei kaei kaba bha tam ban leh naka bynta ka ri baroh kawei”ong ka MLA naka NPP.
