Shillong Nailar 16: Ka Iingkashari Meghalaya High Court hynne ka sngi ba-ar kala bthah ia ka sorkar Jylla ban khmih ia ki jingeh na ka jingkyntur ki nongshongdukan madan sha ki footpath bad ka jingkynnoh siew pisa sha ki riew shimet kum ka bai ai jingiada ban buh ia kine ki dukan.
Ha ka hukum bala pynmih ha ka jingshong bishar ia kane ka kam, ka Iingkashari ki arngut ki Nongbishar kala rai ban pynkynriah ia ka jingshong bishar biang sha ka 24 tarik Nailar, hadien ba ka Jylla kala pyntip ba kam pat dep satia ban shna ia ka Rule ban the kyndon ia ki Nongshong dukan madan ha Jylla.
Hynrei ka hukum ka ong, ba ka Iingkashari kala pynpaw ba kam sngew iahap ba ki nongshong dukan madan kin kyntur sha ki lynti iaid kjat ki briew ha baroh kawei ka sor Shillong bad Tura, ki artylli ki sor ha jylla bad ha kiwei kiwei ki jaka ruh.
Ka Iingkashari ka ong ruh ba kila don ki jingtip ba ki Nongshong dukan madan ki hap ban siew pisa sha ki riew shimet ban buh ia ki dukan, kaba long kum ka bai ai jingiada ban nym don ba pynthut ba ong ha ka ktien nongwei ka Protection money.
Namar kata, ka IIngkashari kala bthah ia ka Sorkar Jylla ban khmih bniah ia kane ka kam. “La bthah ia ka Jylla ban khmih ia kane ka kam bad ban leh eiei da kaba tyngeh” kala ong.
Kane ka mukotduma ka dei kaba la mudui da ka Meghalaya & Greater Shillong Progressive Hawkers & Street Vendors Association (M&GSPH&SVA).
Haba pdiang ia ka hukum, u General Secretary ka Association Bah Shane Thabah ula ong ba ka Association kala iasaid jur bha la ka dei ha Iingkashari ne ka jingiakren bad ka Sorkar ha kine ki hynriew snem bala lei noh, ba kyntu ban buh kyndon ia ka jingshongdukan madan kat kum ka ain, khnang ba ki nongshong dukan madan kin lah ban kamai jakpoh khlem kano kano ka jingshah pynthut.
“Ngi la dei aiti ia ki draft rules sha ka Sorkar la bunsien bad kyrmen ba ka sorkar kan bishar ruh ia ki. Kine ki rules kin pynthikna ia ka jingpyntreikam thina ia ka ain kum ka jingthaw ia ka Town Vending Committee (TVC), ban survey ia ka jingdon ki nongshong dukan madan, ban ithuh ia ki jaka shong dukan madan bad ai ia ki licence shong dukan madan bad kiwei kiwei” ula ong.
Ula pynpaw ruh ba ka Association ka pdiang ruh ia ka jingshem ka Iingkashari ba iadei bad ka jingong ba ki nongshong dukan madan ki hap ban siew pisa ban ioh buh ia ki dukan.
“Ngi kum ka Association, naduh kaba sdang ngi la pyrshang ban buh jingkylli bad ialeh pyrshah ia kane ka kam be-ain bad jinglum pisa jubor. Da ka jingai licence noh ban shong dukan madan, yn sa lah ban tehlakam ia kine ki kam beain” ula ong.
