Shillong, Rymphang 07: Ka National People’s Party (NPP) ka la nang pynkhlain iaka Party hadien ka jingwan rung palat 300 ngut ki dkhot na ka thain Tura bad ka thain Garobadha.
Iaki palat 300 ngut ki nong kyrshan thymmai ka pdiang sngewbha da u Myntri Rangbah ka Jylla u Conrad K Sangma haka jingdonlang lang u MLA u Subir Marak bad ki nongïalam ba rangbah jong ka NPP.
Haba kren ha kane ka sngi u Conrad u kyntu ïa ki ban ïatreilang na ka bynta ka kam kaba kham khraw jong ka imlang sahlang.
“Katba ngi dang iaid sha ka jingpynroi ia ka jylla jong ngi, ngi dei ban pynphriang ia ka khubor jong ka jingiatylli” la ong u Conrad.
U Conrad u la ban jur ia ka jingangnud jong ka Party ban iakhun na ka bynta ka hok jong ki trai ri trai muluk bad u la pynthikna ia ki dkhot ba thymmai ia ka jingkyrshan jong u ban iatreilang na ka bynta ka ilekshon GHADC ban wan.
Kane ka jingïalang ka la long kaba la pynpaw da ka jingsngewkmen bad jingkyrmen, ha kaba ki dkhot thymmai ki la kular ban trei shitom na ka bynta ka jingjop jong ka Party.
“Ka jingpyrkhat jong ka NPP ia ka jingiatylli, ka jingkiew shaphrang, bad ka jingbha jingmiat jong ki paidbah ka pynsawa ia ngi, bad ngi sngewkmen ban long shi bynta jong kane ka lynti” u la ong.
Kane ka jingïalang ka la pyni ïa ka jingkhlain jong ka NPP ha kane ka thaiñ, ha kaba ki paidbah ki la nang bun kiba thrang ban ïasoh bad ka thong jong ka NPP ban kyntiew ïa ka Jylla Meghalaya bad ban ïada ïa ka hok jong ki trai ri trai muluk.
 ka la nang pynkhlain iaka Party hadien ka jingwan rung palat 300 ngut ki dkhot na ka thain Tura bad ka thain Garobadha){kind=link}