Shillong, K’lyngkot 05 : Ka Khasi Students Union (KSU) hynne ka sngi palei, kala pdiang ia u Myntri ka Sorkar Pdeng ba khmih ia ka Tnad Agriculture & Farmers Welfare Narendra Singh Tomar, da ki jingpyrta slogan ba pynpaw ia ka jingpynrem halor ka jingkynnoh shukor ka Sorkar Pdeng ban tei ia ka Central Agricultural University (CAU) ha Jylla.
U Narendra Singh Tomar ula wan poi hynne ka sngi ha Kyrdemkulai, Ri-Bhoi ban plie paidbah ia ka College of Agriculture, Kyrdemkulai, kaba dei ka shnat pule jong ka Central Agricultural University (CAU) jong ka Imphal.
Ka KSU kala shim ia kane ka sienjam ban pynpaw ia ka jingpynrem kaba jur ia ka Sorkar Pdeng namar ka jingkular ban tei ia ka Central Agricultural University la ka jong ha Meghalaya, kaba la kular ha u snem 2010.
“Ka Sorkar Pdeng kala shukor ia ka Jylla Meghalaya namar kane ka College of Agriculture ha Kyrdemkulai ka dei tang ka shnat pule jong ka CAU ka Imphal. Kane kala pynduh lad shibun ia ki samla pule ka Jylla bad kumjuh ruh ia ki nongrep” ong ki Nongialam ka KSU.
Kila pynpaw ba khlem pep, ka jingiohrung klas bad ka jingiohkam iohjam kan ym long satia ia ki samla trai jylla hangne hynrei kin dei kiba na Jylla Manipur.
Ka KSU kala dawa ia ka Sorkar Jylla ba kan tuklar ia kane ka kam ban pynthikna ba ki samla pule ka Jylla kin ioh jingmyntoi na kane ka jaka pule bad kumjuh ruh ki nongrep nalor ki nongshongshnong bala nang la stad ba kin iohkam iohjam.
