Shillong Nohprah 04: Ka Bharatiya Janata Party (BJP) kala pynpaw ia ka jingsngewnguh ia ka sorkar jylla kaba la pdiang ia ka jingai jingmut ban wanrah ia ka jingkylla ha kaba iadei bad ka eksamin jongka Meghalaya Public Service Commission (MPSC) kaba kynthup ia ka jingpyniaid ryntih kumba long ka Union Public Service Commission (UPSC).
Katkum ka kyrwoh kaba la phah hynne ka sngi Palei, u Nongaiktien ka BJP u Bah Mariahom Kharkrang ula ong, “Ka Sorkar Jylla kala mynjur ia ka jingpynpaw bad jingai jingmut ka BJP Meghalaya ha kaba iadei bad ka eksamin MPSC, ka rukom pynlong bad ki kyndon kiba la buh kidei ki bynta kiba la pynleit jingmut na ka bynta ban wanrah ia ka jingkylla”.
Kane kadei hadien ba la pynmih ia ka shithi da u Deputy Secretary uba khmih ia ka Personnel & AR (A) department ha ka 26 tarik u Naiwieng kaba la phah sha u President ka BJP ha kaba la pyntip, “Ki jingai jingmut ki jong phi ban iaid ryntih bad ki kyndon jong ka UPSC kidei kiba la pdiang. Ia kane ka mat yn sa khmih bniah bha da ka sorkar kynthup ia ka jingbiang bad ki bynta kiba lah ban pyntreikam”.
Ka seng kala ai jingmut ba ia ka eksamin MPSC dei ban bud katkum ki rukom leh jongka Union Public Service Commission (UPSC), ban ailad ia ki samla pule ban iakhun ha ka ‘Preliminary Stage’ hashwa ba kin pyndep ia ka jingpule Graduation ka jongki. Kumba long mynta, ki samla pule kidei ban pyndep shwa ia ka ‘Graduation’ shwa ban aplai ban iakhun ia ka eksam Civil Services kaba lam sha ka jingduh ei shi snem ia kiba bun ki samla kiba la biang ban iakhun ia ka eksam.
Ka BJP kala kdew ruh ba ka eksam MPSC kam shym la don satia iaka jingbuh tarik lypa, kaba lam sha ka jingbym thikna da ki snem ia ki samla kiba la lah ban iakhun.
“Ka jingtynruh jong ki nongialam ka BJP kadei kaba la pdiang mynta da ka sorkar kaba la kular ban khmih bniah ia katei ka mat, ka jingbit jingbiang ha ka jingpule bad ban khmih bniah ia ki bynta kiba long kiba lah ban pyntreikam” la ong u Bah Kharkrang bad ka bynrap “(Ngi) pynpaw ia ka jingsngewnguh bad ai khublei ia ka sorkar Meghalaya bad ia u Myntri Rangbah u Conrad Sangma kiba la pdiang ia ki jingai jingmut kiba kongsan jong ka seng”.
U President ka BJP u Rikman G Momin ula phah da ka jingthoh sha u Myntri Rangbah ka Jylla u Conrad Sangma ban pynpaw ia ka jingdonkam ban wanrah ia ki jingkylla.
Ka jingbteng ka seng ban tynruh ba ka MPSC kan treikam kaban long ryntih bad ka UPSC kadei da ka jingthmu ban wanrah ia ka jinglong jingman kaba biang bad ia ka lawei kaba phyrnai na ka bynta ki nongshong shnong ka jylla, la pynkut u Bah Kharkrang.
 kala pynpaw ia ka jingsngewnguh ia ka sorkar jylla kaba la pdiang ia ka jingai jingmut ban wanrah ia ka jingkylla ha kaba iadei bad ka eksamin jongka Meghalaya Public Service Commission (MPSC) kaba kynthup ia ka jingpyniaid ryntih kumba long ka Union Public Service Commission (UPSC).){kind=link}