Nongpoh, Naiwieng 28: Ki nongialam jong ki katto katne tylli ki kynhun sengbhalang hynne ka sngi Ba-ar, ki la pdiang burom ia ka kynhun ki rang bad ki thei ialehkai iakhun kti (Arm Wrestlers) ka jylla Meghalaya hadien ba ki la lah ban wanrah ia ka nam ka burom lyngba ka jingioh khur takma na ka lympung Asian Arm Wrestling Championship kaba dang shu dep shen ha ka Ri Uzbekistan.
Ka Asian Arm wrestling Championship kala long ha ka 17 Naiwieng haduh 25 Naiwieng. Napdeng ki rang bad thei iakhun kti ka Jylla ba shah jied ban mihkhmat ia ka Ri India , 3 ngut ki la ioh ban khur ia ki takma rnong bad 2 ngut ki la kot ha ka kyrdan ba 5 bad ba 7.
Ki 3 ngut kiba la ioh ban khur takma rnong ki kynthup ia ka Senibi Syngkli na Umden, Ri Bhoi District ha ka 55kg senior, ka Airikmen Shabong na 3 Mer Shillong ha ka 50kg young category bad ka Wandalin Syiemiong na Shyiap, Shillong ha ka 60kg senior.
Katba u Alansun Marbaniang bad u Kishore Chettri ki la kot sha ka nam ba 5 bad 7 ha ki kyrdan ialehkai jong ka 85 bad 90kg senior.
Ki nongialam jong ka RBYF, HNYF, MPSO bad NKU, ki la pdiang sngewbha ia kane ka kynhun bad pynkup burom ia ki mar ia poi ha Nongpoh.
