Shillong, Naiwieng 28: Ka Petroleum Dealers Association of Meghalaya (PDAM) hynne ka sngi kala pynbna ba ka Association ka kyrshan iaka jingkynra bad kem ki Pulit ka Jylla iaki katto katne kiba tuh umphniang ha shiteng lynti jong ki surok bah ka Jylla.
Haba kren sha ki Lad pathai khubor u President ka Association Bah Kennedy Khyriem ula iathuh ba kane ka jingiatuh umphniang bad ka jingiakhleh um ha shiteng lynti kala iaid mynta la bun snem bha bad kane kala wanrah ia ka jingduh nong kaba jur iaki Petrol pump bad ka jingma iaki paidbah kiba pyndonkam iaka umphniang.
U Bah Kennedy ula iathuh ba ka Jylla kam don Petroleum ne Diesel nalade bad ka donkam ban kit na shabar ka Jylla hynrei bun ki Petrol Pump ha Meghalaya ki shah shet ha ki Trok kiba wanrah umphniang na shabar Jylla.
Ula iathuh ba ki kali kiba kit iaki Petroleum bad Diesel ban pynpoi sha Meghalaya ki dei ki jingim jong ki Petrol Pump ki ban pynpoi umphniang sha ki paidbah ka Jylla.
Nalor kane u Bah Kennedy ula iathuh ba ki Petrol Pump ha Meghalaya ki don ka jaka pyllang umphniang kumba 60 hajar haduh 1 lak Litre katkum ka jingheh ki Petrol Pump.
“Ka don ka jingiatuh umphniang bad ka jingiakhleh um haki umphniang bad ki Pulit kila pynlong ia ka jingtalasi bad kila ioh kem ruh iaki katto katne kiba donkti ha kine ki kam beain. Ka Petroleum Dealers Association of Meghalaya ka kyrshan ia kane ka jingleh ki Pulit” la ong u Bah Kennedy.
U Bah Kenedy ula ong ruh ba ka Association ka kyrshan iaka Sorkar bad iaki Pulit ka Jylla kiba la trei shitom ban pynduh jait ia kum kine ki jinglehtuh iaka umphniang kali bad pynrem jur lada don kano kano ka jingleh donbor daki Pulit kumba la kynnoh ka seng North East Petroleum Mazdoor Union (NEPMU).
Haba kyntu iaki paidbah, u Bah Kennedy ula ong “Ki paidbah ka Jylla kim dei ban khuslai namar ka Jylla ka don ka Umphniang ban pynbit pynbiang iaka jingdonkam ki paidbah” la ong u Bah
Lah ban kdew baka NEPMU kala pynbna ban sangeh pynpoi Petroleum bad Diesel sha Meghalaya naduh 29 tarik mynta u bnai daka ba kynnoh leh donbor ki Pulit ka Meghalaya haki surok bah ka Ri-bhoi District.
