Nongpoh, Nailar 22: Ka Ri Bhoi Dorbar hynne ka sngi Ba-ar, ka la leit pdiang burom ia u ophisar MCS Raja Brahma u ba la wan ban shimti biang ia ka kam ban shakri ia ka them Ri Bhoi District kum u Additional Deputy Commissioner ka district bad ruh kum u Project Director ka DRDA.
Ki nongialam ka Ri Bhoi Dorbar ba ialam da u President Bah RB Shadap, ki la leit ban pdiang burom ia u Raja Brahma ha ka ophis treikam ka jong u, da kaba ia phylliew jingmut ruh kumno ban iatreilang ha kane ka kynti na ka bynta ban kyntiew ia ka roi ka par jong ka district hi baroh kawei.
Lah ban kdew, ba uRaja Brahma ula shakri teng ha kane ka district kum u Block Development Officer ka Umsning C&RD Block bad ruh kum u Border Majistor. U dei ruh u ophisar u ba la don ka bynta kaba khraw ha kaban shakri ia kane ka district khamtam ia ki shnong khappud khamtam ia ki kynhun bapher bapher naduh ki SHG’s bad kiwei kiwei.
U Bah RB Shadap u la pynpaw ia ka jingkmen bad ka jingsngewnguh ia ka sorkar jylla kaba la ibit ban phah biang ia une u ophisar ba shakri ia ka district, da ka jingangnud ba u ne u ophisar un nang lah ban treikam kham bha shuh shuh na ka bynta ka bit ka biang bad ka bha ka miat jong ki paidbah.
U la iathuh ruh, ba ha kane ka jingiakynduh bad u MCS ophisar, na ka liang ka Ri Bhoi Dorbar ka la ioh ban ia phylliew jingmut kumno ban nang lah ban wanrah ia ki kam pynroi ha ki shnong ki thaw jong kane ka district bad khamtam eh halor ka lad iohkam iohjam jong ki khun samla lyngba ka District Selection Committee (DSC).
Ka Ri Bhoi Dorbar ka la buh ruh ia ka jingkyrpad lyngba u ne u ophisar ba un shimkhia noh marmar ban tuklar lem bad ki bor ba dei peit jong ka District ha kaban lah ban pynmih noh ia ka resol jong ka DSC na ka bynta ki post bapher bapher kiba la lait ha kane ka district.
Pule ruh: Dawa ka HYC ban pyndep mardor ia ka Residential School ha Myrdon Mawtari
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
