Shillong, Kyllalyngkot 16:Kum ka jingburom ia ka President ka India ka Droupadi Murmu kaba la wan ha ka sien kaba nyngkong eh ha ka jylla, hynne ka sngi ka Sorkar Jylla kala pynlong ia ka jingialang pdiang sngewbha ha Raj Bhavan, Shillong.
La pdiang burom ia ka President da u Lat ka jylla u Phagu Chauhan, u Myntri Rangbah ka jylla u Conrad K Sangma, ka Mynti ka Koitka Khiah ka Dr M Ampareen Lyngdoh bad u General Secretary ka Synjuk ki Rangbah Shnong u Bah R Blah.
Haba ai jingkren, ka President Droupadi Murmu kala iaroh iaka jingitynnad jong ki sawdong sawkun ka mariang ka jylla Meghalaya bad kala ai khublei ia ka sorkar jylla bad ia ki paidbah ka Meghalaya kiba la pdiang sngewbha ia ka haka jingwan ha ka sien kaba nyngkong eh kum ka President ka India.
Kala pynpaw ia ka jingkmen halor ka jingplie ia kiba bun tylli ki projek kam pynroi bad kakyrmen skhem ba kane kan kyntiew iaka roi ka par jong ka jylla bad kan wanrah ia ka roi ka par ia baroh.
Ka President kala pynpaw ba ka Meghalaya ka don ia ka ladkaba khraw lyngba ka kam jngohkai pyrthei bad kala iaroh ia ki projek kiba la pyntrei da ka sorkar jylla kynthup iaka jingsdang pyntreikam ia ka Meghalaya Tourism Policy 2023 bad ban pynlong ia ka International Tourism Mart ha Shillong bad kala pynpaw ba kum kine ki sienjam kin iarap ha kaban pynsngewthuh ia ka jinglah ka jylla bad kathain shatei lam mihngi ha ka kam jngohkai.
Ha kaba iadei bad ka ‘Act East’ policy jong ka sorkar India, ka President kala pynpaw ba ka Meghalaya bad baroh ki jylla ka thaiñ shatei lam mihngi kidei ban trei ha kadur jong ka mishon ban pynthikna ban biang ka leit ka wan, ka iohkam iohjam bad ki jingtei kiba don ha ka thain, da kaba phaikhmat sha ki jaka kiba kongsan khamtam haba ka thain ka long kum ka khyrdop sha ka South East Asia.
Haba ai jingkren ha ka jingialang, u Lat ka jylla ula ong ba ka jingwan ka President ka long ka histori bad ula pynpaw ia ka jingsngewnguh halor ka jingleit plie ka jongka ia ka 5th Meghalaya Games ha Tura bad kumjuh ia ka jingplie ia ki projek kam pynroi da ka jingthmu ban kyntiew iaka ioh ka kot jong ka jylla.
Ula bynrap ruh ba ka President kala don ia ka jaka ha dohnud jong ki paidbah da kaba leit sha u paidbah khamtam eh sha ki self – help group jong ki kynthei, ula iaroh ba kadei ka kynthei riewlum kaba nyngkong eh hapoh ka ri kaban iohia ka burom ban long kum ka President bad kumjuh kum ka President kaba dang khynnah tam jong ka ri.
Katba u Myntri Rangbah ka jylla ula ai khublei iaka President kaba la ai mynsiem ia ki samla jong ka jylla da kaba plie ia ka Meghalaya Games bad kala long ruh ka President kaba nyngkongduh jong ka ri ban sah hapoh ka Raj Bhavan kaba dang shu dep plie thymmai ha Tura.
