Guwahati, K’lyngkot 17 : Ka Indian Meteorological Department (IMD) kala pyntip ba kala don ka jingkylla bak ly bak jong ka mariang bad ka tlang ha ka thain Shatei Lam Mihngi ka Ri namar ka jingdon ka cyclone ne eriong ha ki thain ba Shathie jong ka Bangladesh naduh ka sngi Nyngkong.
Ka lyer khriat kaba wan sha ka thain Shatei Lam Mihngi ka Ri India, kala nang pynkhriat ia ka tlang ha jan baroh ki Jylla ka thain. Kat kum ka jingkhein ka IMD ha kine ki 24 kynta, ka jingkhriat kaba jur kan wan ha kiba bun ki jylla ka thain ba kynthup ia ka Assam, Arunachal Pradesh bad Meghalaya.
“Kiba bun ki District ka Arunachal Pradesh kila shah tap ha u thah ha kine ki khyndiat sngi. Wat hadien 37 snem, katto katne ki bynta ka Nagaland la ioh jingtip ba la hap thah hynne ka por mynstep” ong ki heh ka IMD.
Wat ha Nongbah jong ka Meghalaya, Shillong, ka jingkhriat kala hiar sha ka 3.0 degree Celsius ha ka sngi Ba-ar.
Ha kine ki 24 kynta tad haduh hynnin ka janmiet, kala don ka jinghap u lap praw ha katto katne ki bynta jong ka Assam, Arunachal Pradesh bad Meghalaya.
Ka IMD ka pyntip ba ka suin bneng kan dang iai bteng ban tap lyoh ha ki katto katne ki district ka Assam kynthup ha Guwahati, ha kine ki lai sngi ban wan. Ka lah ruh ban don ka jinghap slap ha ki katto katne ki jaka.
