Shillong, Risaw 24 : Namar ka jingkyrkhu da ka jingitynnad ka mei mariang, ka suinbneng kaba pynngad bad ki briew kiba sngewtynnad, ka Nongbah jong ka Meghalaya-ka Shillong kala paw kyrpang ha ka thup Top 10 na ki jaka shangkai pyrthei hapoh Ri India.
Mynshuwa, kane ka Sor halor lum ka dei kaba juh eh da ki Nongsynshar ka Ri Bilat, kaba pynkynmaw ia ki iala ka jong ka Iing ha Scotland da ki lum ki them kiba itynnad, ki diengkseh, ki kshaid ba noh rymphum bad ka suinbneng kaba sngewtynnad. Namar kata, kila ai kyrteng ia ka kum ka “Scotland of the East”.
“Kum ka nam “Scotland of the East”, ka Shillong kala khring bha ia ki nongwan shangkai da ki jingitynnad ki jaka, ki khlaw ba rben, ki kshaid kat shaba phai bad ki pung um ba ithiang” ong ka Global App “The Trends Report 2025” bala pyllait da ka Skyscanner.
Kat kum ka kaiphod, ka Shillong kala paw kum kawei na ki jaka ba jur bha ka jingwad liengsuin ban wan kai da ki nongshangkai pyrthei, kiba kwah ban wan iuhkjat sha ki jaka bym ju kham poi ki briew ba nabar.
Ha ka kaiphod, ka Shillong kala paw tang ma ka kum ka Sor jong ka Ri India ha ka thup Top 10 na ki jaka shangkai ia kaba ki nongshangkai na kylleng ki Ri ka Pyrthei kila wad bha ia ki liengsuin ban ioh wankai. Ka kaiphid ka ong ba ka Shillong kala sakhi ia ka jingkiew haduh 828% na ka jingiawad liengsuin jong ki briew ba kwah wan kai haba ianujor bad u snem 2023.
Watla ka Meghalaya, khamtam ka Shillong bad ki khapsor, kila sakhi ia ka jingkiew ha ka jingwan ki nongshangkai pyrthei, hynrei ki dang don shibun kiei kiei kiba dang donkam ban leh eiei ban lah kyntiew ia ki kam jngohkai.
Ka Sorkar Jylla kala pyrshang bor bah ban khring ia ki nongshangkai pyrthei bad kala sdang ruh ia ki sienjam ban tei ia ki jingtei ba kongsan kum ki Hotel, ki Homestay bad ka jingpynheh ia ki kad Liengsuin bala don lypa.
Nalor ki kam tei jingtei, ka Sorkar kala wanrah ruh ia ki policy ban pynlong ia ki tamasa bapher bapher ha baroh shisnem lynter kynthup ruh ia kane ka tamasa synrai ban wan, ka ban iatreilang bad kiwei ki Ri kum ka Japan, kan nang iarap ban kyntiew shuh shuh ia ki kam jngohkai.
Ka Sorkar Jylla kala buh ban pynlong ia shibun ki tamasa ha kane ka synrai ba mynta ba kynthup ia ka Shillong Literary Festival ka ban long haka 12-14 tarik Naiwieng, ka Shillong Cherry Blossom Festival ka ban long ha ka 15-16 tarik Naiwieng, ka Me’gong Festival ka ban long ha ka 29-30 tarik Naiwieng, ka Hills Festival ka ban long ha ka 6-7 tarik Nohprah, ka Bryan Adam India Tour ha ka 10 Nohprah bad ka Winter Takes ka ban long ha ka 12-14 tarik Nohprah bad kiwei kiwei.
Katto katne na kine ki tamasa kila pyni ia u soh, kum ka kaiphod jong ka Skyscanner bad ka Sorkar Jylla kala antad ba hashuwa u 2028, haduh 40% na ki nongshongshnong ka Jylla kin sa iadonbynta lang ha ki kam jngohkai.
U Vice-President ka Ri Jagdeep Dhankar dang shen ula kren halor ka spah jong ka Meghalaya ha ki kam jngohkai bad ong “Lada dei ba don ka bneng, ka dei ha India, bad lada dei ba don ka mynsiem ba kynja Blei, ka dei ha Meghalaya”.
