Shillong, Nailur 14: U Symbud Myntri Rangbah ka Jylla hynne ka sngi Balang ula ong ba ka Sorkar kam pat don jingthmu ban pynkynriah ia ki Nongshongdukan madan katba kam pat lah ban ai jaka ia ki ba kin shong dukan bad die ia ki mar ki mata ban kamai jakpoh.
Haba jubab ia ka Zero Hour Notice bala wanrah da u MLA ka Mawlai Bah PT Sawkmie ha Iingdorbar, u Bah Prestone ula ong ba ka jingthmu hi ka long ban pynbeit ryntih ia ki kam baroh khnang ba ki nongshong dukan madan kin ym kyntur kulmar sha ki jaka paidbah bad pynthut ia ka leit ka wan jong ki briew bad ki kali.
“Ngi la shim ia ki sienjam ban lah tehlakam ia kane bad ngin sa pynbeit ia kane ka kam ha ka lynti kaba dei” ula kular.
Haba pynpaw ba ka Sorkar kam peit khmat shiliang halor ka kam jong ki nongshongdukan madan ha Jylla, u Bah Prestone ula ong “Da kaba khmih ia ki jingeh jong ki Nongshongdukan madan bad ban pynthikna ba kan don ka jingteh kyndon ba kumjuh ia baroh ki nongshong dukan madan, ka Sorkar kala wanrah ia ka Bill ha kane ka Dorbar ban pynduh noh ia ka Meghalaya Street Vendors (Protection of Livelihood Regulation of Street Vending) Rules 2022 bad ban pyntreikam lang noh da ka Street Vendors (Protection of Livelihood and Regulation of Street Vending) Act, 2014 jong ka Sorkar India”.
U Bah Prestone ula ong ba kane ka Bill/Act ka kren halor ka jingleh survey ia ki nongshongdukan madan, ban register kyrteng ia ki, ban ithuh ia ki jaka shong dukan madan, ban pynkynriah ia ki nongshongdukan madan bala dep register sha ki jaka bala ithuh, ban thaw ia ka Town Vending Committee, ban thaw ia ka Grievance Redressal Machanism bad kiwie kiwei.
Ula pyntip ruh ba ka Sorkar kala dep notify ne pynmih ia ka Meghalaya Street Vendors (Protection of Livelihood Regulation of Street Vending) Rules, 2022.
Da ka thong ban tehkyndon ia ka rukom shong dukan madan ha ki jaka sor ka Jylla, ka Sorkar Jylla kala mynjur ia ka Meghalaya Street Vendors (Protection of Livelihood and Regulation of Street Vending) Act, 2014.
Namar kata, ka sorkar kala thaw ia ka Street Vendors (Protection of Livelihood and Regulation of Street Vending) Rules, 2017 bad ka Street Vendors (Protection of Livelihood and Regulation of Street Vending) Scheme, 2017 ban khmih bad pyniaid ia ki kam jong ki nongshongdukan madan.
Kat kum ki kyndon jongkane ka Ain ka Jylla, haduh 1249 ngut ki nongshong dukan madan kila dep register ialade ha ki 6 tylli ki Municipal Town jong ka Jylla. Napdeng kine, tang 342 ngut ki nongshong dukan madan kila register ha Shillong.
U Bah Prestone u ong ba ka jingduna ki nongregister ha Shillong ka dei namar ka jingdon ka mukotduma ba dang shu pynwai dang shen da ka Iingkashari High Court ha kaba ka Seng ki Nongshongdukan madan bala tip kum ka Meghalaya & Greater Shillong Progressive Hawkers & Street Vendors Association (M&GSPH&SVA), nalor kiwei kiwei ki ishu, kala tynjuh pyrshah ia ka jingtreikam jong ka State Act pyrshah ia ka Central Act kaba treikam ha ka Ri baroh kawei.
Namar kiba bun ki nongshong dukan madan ki dei na Shillong bad kiba dei ruh ki dkhot kane ka Seng, ka kynhun kala pyrshah jur ia baroh ki kam bala pyntreikam kat kum ka State Act naduh bala mudui ia ka mukotduma.
Hynrei ula ong ba shuwa ka jingpynwai ia ka mukotduma ha ka 24 tarik Nailar, ka Iingkashari ha ka hukum ba 16 tarik Nailar kala bthah ia ka sorkar Jylla ban leh eiei halor ka jingkyntur jong ki nongshongdukan madan sha ki lynti iaid briew kaba ktah ia ka iaid ka ieng ki paidbah.
Halor kane ka hukum ka Iingkashari, ka Deputy Commissioner ka East Khasi Hills kala shim ia ka sienjam ban pyntreikam ia ka hukum da kaba thaw ia ki Committee bala khlieh da ki Magistrate ban iathuh ia ki jaka ba khapngiah bala shong dukan madan bad ban pynkynriah noh ia ki na kine ki jaka.
