Shillong Nailur 11: Ka United Democratic Party (UDP) haka sngi saitjain kala pynpaw ba kam pat shim la ioh pdiang ia satia ia kano kano ka shithi na u MLA ka Mawphlang Eugeneson Lyngdoh ba un ym iakhun shuh iaka elekshon MLA ban wan.
“Ngim pat ioh pdiang ia kano kano na u (Eugeneson) ban pyntip ba un ym iakhun shuh iaka elekshon MLA 2023” ong u President ka UDP East Khasi Hills District u Bah Titosstar Well Chyne haba jubab ia ka jingkylli jongki nongthoh khubor halor ka khurbor ba saphriang ba utei u khlur ialehkai football ym don jingthmu shuh ban iakhun elekshon.
“Haduh mynta ngi dang don ka jingshaniah kaba skhem ba yn iakhun beit iaka elekshon bad un long ruh u kyrtong jong ka seng na Mawphlang constituency” ong u Bah Chyne, uba long ruh u CEM ka KHADC.
Une u nongialam u la iathuh, ba u MLA ka Mawphlang ym shim la ai ksai eiei ruh em ba um kwah ban iakhun shuh iaka elekshon ban wan.
“Ka khubor halor ka jong u ba ym long shuh uba la pynkhreh ban iakhun iaka elekshon ban wan ka lah ban dei tang ka jingpynsaphriang jong ki katto katne” ong u Bah Chyne bad ka bynrap, ba u Eugeneson ym lah ban iashimbynta ha ka jingrakhe dap 25 snem jongka seng kadei namar ka jingdap shi snem jong ka jingkhlad noh u Kpa jong u, u Bah SK Sunn.
Nalor kane, u la ong, ka jingwan pyniasoh u nongialam barim ka FKJGP Bah Wellbirth Rani kadei ban pynkhlain iaka seng ha Mawphlang constituency bad haka jylla baroh kawei.
U Bah Titosstar u la ong, ba ym lah ban pynduh tiket ia u MLA bad katei ka long katkum ka rai jong ka seng UDP.
U la iathuh, ba ka Election Committee jong ka UDP shen kan sa shong jingialang ban shim iaka rai ha kaba iadei bad ki kyrtong kiban iakhun iaka elekshon MLA 2023.
