Shillong, Naiwieng 25: U Myntri ka tnat Law Bah Lahkmen Rymbui u la pynshai ba haduh mynta ym shym la don kano kano ka draft Bill ne ka ain ba shna halor ka HIV/AIDS kaba la poi sha ka tnat.
“Katkum ka jingtip jong nga, ym pat don ei ei hangne. Ka tnat ka koit ka khiah bad ka tnat Social Welfare ki dei ban leh shwa iaka jingdonkam ne ia ka jingpeit bniah” ong u Bah Lahkmen.
“Lada baroh ki long kiba biang ngin sa rah sha ka kynhun Myntri Sorkar bad ka kynhun Myntri, lada ka shim ba ka long kaba biang, kan sa rah sha Iingdorbar thawaiñ ban bishar bniah” u la bynrap.
U Bah Lahkmen u pynpaw ka jingsngewkhia halor ka jingkiew ka jingdon kiba don jingpang HIV/AIDS ha Meghalaya, ha kaba ka Jylla don ha ka kyrdan kaba hynriew ha ka ri baroh kawei.
“Kane ka dei ka mat kaba khia bha ha ka Jylla jong ngi. Ngi hap ruh ban peit ïa ka jingma jong u drok ne jingpang HIV, la ngi pynthut ne em shimet jong uwei pa uwei u briew. Kumta nga hap ban pule ha ka liang ka aiñ, nga hap ban pule kumno ban leh ïa kane. Ka ka long kaba dang kloi palat na ka bynta jong nga namar ngam pat ïohi ïa kano kano ka Bill ban pynïaid shakhmat ïa kata ka aiñ” u la ong.
