Shillong, Nohprah 29 : U Nongialam ka BJP bad Myntri Sorkar Bah Sanbor Shullai hynne ka sngi palei, ula kyntu ia ki Nongialam ka All India Trinamool Congress (AITC) bad Congress ba kin applai ia ka ticket jong ka BJP lada kim sngew thikna ban jop ia ka elekshon MLA-2023 hala ki jong ki Constituency.
Haba kynthoh ba ka Congress bad AITC kila kulmar jingmut kumno ban pan ia ka jingkyrshan na ki Khristan ha ki Constituency bapher bapher, u Bah Sanbor ula ther tyngeh ia kine ki party namar ka jingiai kren halor ki ishu niam namar ba ki tip ba kin nym jop satia na ka ticket ka Congress na AITC ha ki Constituency jong ki.
“Baroh artylli ki party kila kulmar jingmut namar kim don lynti pat da kumwei lait na ka jingpynsngew pher niam, ia kaba ngi tip baroh ba ka dei ka kam ka bym dei. Ki dei ban iakhun ia ka elekshon halor ka mat jong ka roi ka par ban ia kaba wanrah ia ka jingsngew iapher niam” ula ong.
U Bah Sanbor ula ong ba haduh mynta ym pat don satia na ki seng niam ne ki Khristan ka Jylla Meghalaya kiba sngew lane kiba la shah byrngem ha ka BJP, ki nongialam lane ha kino kino ki dkhot.
“Phraphew persen na ki nongkitkam jong ngi ki dei ki Khristan. Ka Nagaland kaba don 98% ki vote khristan kala jied haduh 12 ngut ki MLA ka BJP. Ka Manipur mynta u snem kala jied ia 7 ngut ki MLA Khristan jong ka BJP, ha South Goa ruh ka BJP kala jop haduh 9 seat ha u 2022, ha Mizoram kaba bun eh ki Khristan, u M Laikaw jong ka BJP ula bam smai kum u CEM ka Mara Autonomous District Council, ha Gujarat ka BJP kala pynieng ia u kyrtong Khristan ba nyngkong eh u Mohan Konkani na Vyara bad ula jop haduh saw shah ia u MLA ka Congress u Punaji Gamit” ula ong.
Une u Nongialam ka BJP ula ong ba ka long kaba donkam ba ka Congress bad AITC kin leh homework bha bad lada kim lah ban pynurlong ia ki jingkular por elekshon, kim dei satia ban pyrshang kum kane ha kaban pynbiej ia ki nongthep vote ha ka kyrteng jong ka niam. “Kila dei ban wan pyniasoh noh sha ka BJP na ka bynta ka roi ka par” ula ong.
“Wat u Arvind Kejriwal ula kam shuwa ka elekshon Gujarat, ba ka IB kala antad b aka AAP kan khur ia ka jingjop. Lehse kane ka juh ka IB kala iathuh ia ka AITC ba ki Nongialam Khristan kila shah peit pyrman” ula ong haba bynrap “Ki briew kiba iakhun elekshon bad kiba kren shaphang ka niam, kim dei satia ban shah jied ha kane ka Riti Synshar Paidbah ba burom ia baroh ki Niam”.
“Ka long kaba donkam ban kynmaw ba baroh ki skhim ka Sorkar Pdeng kam shym la pyniapher hapdeng ki Jaidbynriew ne ka Niam. Ki dei kiba la mang ia baroh” ula ong.
