Shillong, Rymphang 29 : Ka Meghalaya Human Rights Commission (MHRC) kala phah notice sha u Superintendent of Police (SP) ka East Khasi Hills, ba pan ia ka kaiphod kaba bniah halor ka jingkynnoh thombor u 2nd OC ka Pynursla Police Station ia u President ka HYC-Riwar Mihngi Circle.
Kat kum ka jingpyntip u Secretary ka MHRC, ka Commission kala bthah ia une u Khliehduh ki Pulit ka East Khasi Hills ban aiti ia ka kaiphod hapoh ka 15 sngi.
“Ka Meghalaya Human Rights Commission (MHRC), Shillong, kala shimkhia ia ka jingujor jong ka seng Hynniewtrep Youth Council, Sengkmie bala soi kyrteng da u President bad Secretary pyrshah ia ka jingkynnoh jrong kti u 2nd OC ka Pynursla Police Station ia u President ka Riwar Mihngi Circle ha Pynursla Police Station” la ong u Secretary ka MHRC.
Lah ban kdew, ka Hynniewtrep Youth Council (HYC), ha ka 26 tarik Rymphang, kala leit ban buh da ka jingujor hakhmat u Superintendent of Police ka EKH ba mudui pyrshah ia u 2nd OC ka Pynursla Police Station bah George Dkhar halor halor ka jingkynnoh ba u kren tohmet bad shoh ia arngut ki dkhot ka seng ha Pynursla Police Station myn ha ka 24 tarik Rymphang.
Lah iathuh ba ha kane ka sngi, ki dkhot ka HYC Ri War Mihngi Circle (Pynursla Sub-Division), kila kem ia artylli ki trok kit masi ba thmu ban khaii tuh sha Bangladesh. Hadien ka jingkem ia kine ki trok, kila ialam ia ki sha Pynursla Police Station da ka jingthmu ban ujor ejahar bad ban kyntu ia ki Pulit ba kin leh ia kaba donkam kat kum ka ain.
Hynrei la kynnoh ba haba poi ha Thanad, u 2nd Officer Incharge ha ka jaka ban sngap ia ka jingujor, ula kren tohmet bad kynhied pynban ia ki dkhot ka HYC bad hadien ula patom ia ki shapoh thanad bad ula shoh la bom ia ki da u lathi haduh ba u President ka seng Lamphrang Khonglam, ula mynsaw.
