Shillong, Naitung 05 : Ka Iingkashari Meghalaya High Court hynne ka sngi Balang, kala bthah ia ka Sorkar Jylla ba kan ai ia ka kaiphod kaba bniah bad ba pura (comprehensive) kaba kdew ia ki sienjam bala shim ban khate ia ka jingduna bording elektrik hapoh ka Jylla.
“Ka Sorkar kan ai ia ka kaiphod ba bniah ba kdew ia ka jinglong jingman ha baroh kawei ka Jylla bad ai jingtip ruh ba bniah haba iadei bad ki District bapher bapher. Ka Jylla kan kdew ruh ia ki sienjam bala shim ban lah pynioh tam ia ka bording naka National Grid bad kiwei ki tyllong kiba don ban khate ia ka jingduna bording”, ong ka Division Bench ha ka hukum hadien ba shong bishar ia ka PIL bala mudui da u Flaming Marak.
Ka hukum ka ong ba watla ka Sorkar kala dep ai ia ka status report (ka kaiphod ba long ba man mynta) hynrei ka khlem kdew pat ia ki jinglong jingman ba pura.
Ia kane ka PIL la mudui ha u bnai Jymmang mynta u snem bad shuwa ka jingwan u slap lane ka jinghap u slap kala wan. Ka dei ka jingduna ha ka Jylla ha katei ka por namar ka jingduna u slap bad ka um ha pung Umiam kala hiar bad kala buh jingeh ban pynmih bun ia ka bording.
Ka Jylla kala pynpaw ba da ka jingwan u slap bad ba ka um ha pung Umiam kala kiew, ia kaba bun ka jingeh la lah ban leh eiei.
Ha ka affidavit bala ai kham hashuwa, la pynpaw ba lyngba ka jingdawa ia ka bording ha ka Jylla kala kot 200 mega unit shi sngi, ka jingsam bording pat ka kot tang 88 mega unit shi sngi.
Ka Iingkashari kala pynpaw ba ha ka kaiphod jinglong jingman bala ai da ka Sorkar jylla mynta ka sngi, katto katne ki jing khein la ai ba pynpaw ia ka thup jong ki nongai jingshakri ba kongsan (essential service providers) bala pyllait na ka jing pynlip bording (load shedding), hynrei kam shym la pynpaw pat ia ka jingdawa ba mynta bad ka jinglah sam ia ka bording lane b aka Jylla kala batai ia ki sienjam bala shim ban pynkhlain ia ka jingsam bording elektrik.
“Ka long ka bym lah pdiang ba ka jingduna bording kan kot palat ia ka 50 percent. Ka lah ban long namar ka jingduna slap lane kiwei kiwei ki jingeh b aka don ka jingduna pynmih bording ia katto katne por bad ka jingduna ka lah ban kot ym palat ia ka 10% na ka jingdawa bording shisngi. Hynrei la paw b aka jingduna bording hangne ka long palat ia ka 50 haduh 60% na ka jingdawa bording bad kane ka jinglong jingman ka dei ka bym lah ban pdiang ha kane ka juk ha kaba bun ki business bad ki kam iing kam seng kila shu sahteng namar ka jingbym don ka bording elektrik” kala ong.
Ka Iingkashari kala bthah ia ka Sorkar ban phaikhmat sha ki hydel project barit lane kino kino ki project pynmih bording khamtam eh nab aka Jylla ka dei kaba ioh ia u slap ba jur bad kaba don ia ki jaka ba long riat ha kaba lah ban pyntreikam ia ki project bar it ban lah pyndap ia ka jingdon bording jong ki shnong ba pyntrei ia ki project.
Ka Iingkashari kala buh ban shong bishar biang ia kane ka mukotduma ha ka 25 tarik u Naitung.
Pule lang ia kane: Byrngem ïakhih ka JAC-ARPV lada ym siew pyndep ïaka Pisa Election/COVID Duty
