Shillong, Nailur 30 : Ka Iingkashari Meghalaya High Court hynne ka sngi thohdieng, kala bthah ia u Secretary ba khmih ia ka Tnad Kam Pohiing ba un ai ka kaiphod ba kdew ia ki seinjam bala shim kynthup ka jingtehlakam ia kano kano ka jing pyrshang jong ki Heh Pulit ba shah kynnoh thied kai be-ain, ban pynkynriah kyrteng ia ki nongkynti bad ka pisa.
“Kum ia kane ka kaiphod dep ban file ha ka sngi ban shong bishar biang ia ka mukotduma ka ban long ha ka 17 tarik u Risaw” ong ka Iingkashari ki arngut ki nongbishar ba kynthup ia u Chief Justice Sanjib Banerjee bad Justice W Diengdoh-ha ka hukum bala pynmih halor ka PIL bala mudui da ki arngut ki nongshongshnong ka Nongbah Shillong ba kynthup ia u Riewad Vicharwant Warjri-kaba long pyrshah ia ka jingantad thied kali beain da ki katto katne ki Heh jong ka Tnad Meghalaya Police.
Ki Nongmudui kila kam ba ka Tnad Pulit kala thied ia ki jait pa ki jait ki kali naduh u snem 2019 khlem da ioh ia ka bor na ki bor ba halor bad ba haduh 29 tylli ki kali Pulit kila don ha ka kti jong u Assistant Inspector General (Administration) ka Tnad Meghalaya Police.
Ki Nongmudui ki suba ba watla kila mih ki jingiakren shane shatai hadien ba kane ka kam kala mih pyrthei bad kala don ruh ka kynja jingtohkit ia kane ka kam, hynrei ka lah ban don ka jingpyrshang ban tapeitmiaw ia kiei kiei baroh, kaba kham sniew shuh shuh ka long ba khlem leh eiei pyrshah ia u Nongshah kynnoh lane don ka jingpyrshang ban pynioh pat ia ka pisa paidbah kaba la dep ban pynlut.
Ka Sorkar Jylla kala pyntip ba kala pynlong ia ka jingtohkit bad kane ka kam ka dang don hapdeng ka jingbishar.
Ka Jylla ka pyntip ruh ba ka lah ban pynngat kyndon pyrshah ia ki katto katne ki briew bala ioh ban kurup ia ka mar. Hynrei, ka dang kloi palat ban shim noh mynta ia kane kano ka sienjam ba tyngeh pyrshah ia kine ki briew.
Haba ka Iingkashari ka kylli la kala don kano kano ka sienjam bala shim ban pynthikna ba kito kiba briew bala antad donkti ha lyndet ba kin nym pynkynriah, ai pateng noh ia ki nongkynti bad ter ter, ka Jylla kala ong ba dei tad hadien bala pynthikna donkti kat kum ka jingkynnoh, ba ka Jylla ka lah ban shim ia ka sienjam ban pynioh pat ia ka pisa bala pyndonkam bakla.
Hynrei ka Iingkashari kala ong “Sngewsih, ka kam jyrsieh ba khraw jong kane ka Ri kam dei satia ka jyrsieh hynrei dei ka jingtohkit kaba bud hadien ka jyrsieh. Ha kiba bun ki khep, ki kot ki sla bala kynton kila shu sepei ban tap eitmiaw ia ka jingshisha bad niar eh ba ki Nongleh beain kin ngat ha ki jingsajia lane ka jingpyrshang ban ioh pat ia ka pisa u paidbah bala pynsyrwa ruh kumjuh. La kyrmen ba kane ka kam kan nym iaid ha kane ka juh ka lynti”.
