Shillong, Nohprah 08 : Ka Iingkashari Meghalaya High Court kala bthah ia ka Sorkar Jylla bad ia ka Airport Authority of India (AAI) ba kin wanrah ia ka kaiphod halor ka jingiaid ka kam ba iadei bad ka jingpynhreh ia ka Shillong Airport hapoh ka 11 tarik Nohprah.
“Ngi hukum ia ka Jylla bad ruh ia ka Airport Authority of India ba kin ai ia ka kaiphod ka jingiaid kakam haduh mynta lyngba ka affidavit ha ka 11/12/2025. Ngi khmih lynti ba ia baroh ki kam ba donkam ban leh na ka bynta ka jingaiti lane jingioh ha kti ia ka jaka ba donkam ha ryngkat bad baroh ki jingbit, la pyndep mynta” ong u Division Bench ba kynthup ia u Chief Justice Soumen Sen bad Justice W Diengdoh ha ka hukum ba pynmih hadien ba shong bishar ia ka PIL ha ka sngi Nyngkong.
Ka Iingkashari kala shimkhia ruh ba la dep shim ia ki katto katne ki sienjam na ka bynta ban thied ia ka jaka ba donkam ha kane ka project.
“Hynrei, ka Iingkashari ka donkam ia ka jingshai halor ka jingaiti ia ka jaka ba 11.75 acre ba kam bala dep ban thied da ka Sorkar Jylla bad ka jingphiah/jingai ia ka jaka shipai. Ka Ministry of Defence hala ai ia a Advance Working Permission sha ka Sorkar Jylla ba kan pyndonkam ia ka jaka shipai, halor ka kyndon ba kin ai bujli ia ka jaka ba shongdor kumjuh”.
Ka Iingkashari kala shimkhia ba ka kynhun Myntri kala ai jingmbit ban thied ia ka jaka kaba don ha Umroi Madan, Ri-Bhoi District, na ka bynta ban ia bujli bad ka jaka shipai ba donkam ban pynheh ia ka airport.
Ka Iingkashari kala buh ban shong bishar biang ia kane ka mukotduma ha ka 11 tarik Nohprah.
