Tura, Naitung 28: Ki kynhun Sengbhalang bapher bapher ka Ri-lum Garo kila dawa ia ka jubab ba kumno kat u Myntri Rangbah ka Jylla um shym la ioh ia ka bor pahara kaba biang kum u khliehduh kaba la buh ia ka jingim jong u ha ka jingma, ha ka jingthombor ki paidbhur ia ka Chief Minister Office katba u dang iakren bad kiwei ki kynhun ba dawa Winter Capital.
Kane ka kynhun ki Sengbhalang ba lamkhmat da ka Garo Students Union, FKJGP, AYWO, FAF, ADE bad ka Tura govt College Students Union kila sngew shon halor ka jingkren u Director General of Police (DGP) ka Jylla Dr LR Bishnoi b aka don ka jingthmu ban pyniap ia u Myntri Rangbah ka Jylla ha Ri-lum Garo.
“Ka jingkren u DGP kala pyni sha ka pyrthei b aka Ri-lum Garo bad ki nongshongshnong ki kwah ban pyniap ia u Myntri Rangbah ka Jylla, ka bym dei ka jingshisha. Kaba nyngkong eh kaba baroh ki dei ban tip ka long balei ba tlot ki bor pahara u Myntri Rangbah bad mano ba pynkylla ia ka jaka ban pynlong ia ka jingiakren?” dawa u President ka FKJGP Pritam Marak haba iakren bad ki lad pathai khubor ha ka miet sngi Thohdieng ha Tura hadien ka jingiakren ba sani bha halor ka jingjia ha CMO hapdeng ki Nongialam Sengbhalang.
Ka jingkren u DGP (Bishnoi) ka lah ban wanrah ia shibun kiei kiei ki ban ktah ia ka thain.
Ka pyrthei kala pdiang ia ka jingkren ba ki paidbah ka Ri-lum Garo kila pyrshang ban pyniap ia u Myntri Rangbah ka Jylla Meghalaya. Kane kala buh dak ia ka snap jong ki paidbah ka Ri-lum Garo” ong u Pritam.
Ka jingkylli kaba kine ki Sengbhalang ka Ri-lum Garo ki kylli ka long balei ba ka jaka bala tyrwa ban pynlong ia ka jingialang da kine ki kynhun ba iakhih la pynkynriah na Tura Circuit House sha ka jaka ba shong shah jingit ha kaba ki nongkyrshan jong kane ka jingiakhih bala neh artaiew eiei, kila bitar lypa halor ka jingslem ban wan iakren bad ki.
“Ka jingialang hapdeng u Myntri Rangbah bad ki Sengbhalang ka dei ha ka jingshisha ban long ha Circuit House. Ngi ruh ngi la ioh pdiang ia ka jingkhot sngewbha halor kane. Hynrei kyndit, ngi ioh jingtip hadien ba u Myntri Rangbah ula leit sha ka jaka ba ki nongiakhih ki iakhih. Balei ba leh ia kane bad mano ba rai ban pynkynriah ia ka jaka iakren kaba lam sha kane ka jinglong jingman?” buh jingkylli kine ki kynhun Sengbhalang.
Une u Nongialam ka FKJGP ula buh jingkylli ruh balei ba ki Pulit kila pulom ha ka jinglum khubor syntiat ban antad lypa ia kaei ka ban jia haba la iohi lypa ia ka jingbitar u paidbah kiba ngeit ba u Myntri Rangbah um shym la pynurlong ia ki jingdawa jong ki.
“Hato ka lah ban long ba u Nongkhmih ia ka bor pahara ula shah ia u Myntri Rangbah ban leit sha ka jaka ba iakhih ha pdeng ka jingialum paidbah kaba bun khamtam kiba la bitar lypa ia u” ong u Pritam haba dawa ia ka jubab.
Ula kdew ba ki Pulit kila dep ban antad lypa bad pynkhreh ia kano kano ka kam ka ban jia namar ki top ba kin don beit ki nongkynshoit kumba paw na ki video ha kane ka jaka, ki ban aiding ia u paidbah, kaba lam sha ka jingialun maw bad ban thang ia ki kali.
“Ngim lah ban batai lypa iakane namar wat hashuwa ba ka jingdawa ban jingiakhih kan sdang ha Ri-lum Garo, kala don kum kane ka jingiakhih ha Shillong ha kaba MLA ba don burom (Ardent) ula leh ia kane ka juh ka jingiakhih. Ki long kumjuh ha baroh ki jaka” ong u Pritam.
Ula kdew ba ka jingiakhih kala pyni sha ka Ri baroh kawei bad ka thain ia ka jingdawa bala slem bha halor ka nongbah kaba ar hapoh ka Jylla.
“Ka jingdawa ia ka Winter Capital ka dei ka jingiamynjur rangbah bala rai da ki nongiakhun ban ioh iala ka Jylla. Ngi kwah ban kyrpad ia ki paid Khasi ba kin sngewthuh ba bun na ki paid Garo ki shu kwah tang ia kaei kaba la dep iamynjur lang da ki longshuwa” ong ki Nongialam Sengbhalang ka Ri-lum Garo da kawei ka sur haba pynkynmaw ia ka khana halor ka jingiakhih ia ka Hill State ha ki snem 1970.
