Shillong, Iaiong 27: Ki katto katne ngut ki nongshong shnong ka Sohiong konstitwensi hynne ka sngi kila dawa na u MLA barim bah Samlin Malngiang ban pynshai ba balei katto katne ki nongshong shnong haduh mynta kim pat ioh ka pisa bala mang lyngba ka Special Rural Works Programme (SRWP) scheme 2018-2022.
Haba kren sha ki lad pathai khubor u bah John Wankhar ula iathuh ba haduh mynta ki don kumba 14 ngut ki nongshong shnong napoh ka thain Sohiong kiba khlem pat ioh pisa bala mang lyngba ka SRWP scheme 2018-2022 watla ka kyrteng jong ki ka paw haka thup bala ioh ia kane ka skhim.
U bah John ula pynpaw ia ka jingsngewdiaw bad ka jingsngewkhia halor ka jingioh jingujor na ki nongshong shnong hapoh ka Sohiong konstitwensi ha kaba iadei bad ka skhim MLA jong u snem 2018-2022.
Pule lang ia kane: Iakynduh ka HITO ia u DMHO halor ka jingaiti ïa 15 tylli ki Sub-Center sha ka HANS
“Katkum ka kaiphod RTI bala ioh naka ophis CRD Block Office Sohiong haka 12 tarik Naitung 2022, ka pynpaw ba ki kyrteng jong ki 14 ngut ki paw haka thup ban ioh pisa lyngba ka skhim SWRP hynrei kine ki juh ki biew haduh mynta kim pat ioh satia iaka pisa” la kynnoh u bah John.
Ka kong Wandalin Khongsit naka shnong Kharlakhar, kala iathuh ba ka kyrteng jong ka, ka paw haka thup ban ioh iaka pisa ba kot T.10,000 naka skhim SRWP scheme hynrei haduh mynta kane ka pisa kam pat poi haka Bank Account.
Ka kong Wandalin kala iathuh ba ha ryngkat bad ki katto katne ngut ki riew paidbah kala leit ban ujor shaka ophis C&RD Block Sohiong hynrei haduh mynta ruh kane ka ophis kam pat pynshai balei ka pisa kam pat poi shaka Bank Account, watla ka kyrteng kala paw haka thup ban ioh jingiarap lyngba ka SRWP scheme.
Ka kong Wandalin kala pynpaw ba kane ka jingleh jong u MLA barim bah Samlin Malngiang ka la buh ia ki nongshong shnong ka Sohiong ha ka umdum khamtam ia kiba la mih kyrteng hynrei kiba khlem ioh pat ia ki jingmyntoi.
Pule lang ia kane: Pynshlur u CJ ia ki samla ka Jylla ban pule ia ka lain Ain
