Nongpoh, Ïaïong 27: Ka Hynniewtrep Integrated Territorial Organization (HITO) Ri-Bhoi, hynne ka sngi Palei, ka la leit ïakynduh ia u DMHO Ribhoi District Dr. P Kharnarry ban pan jingpynshai halor ka jingaiti ka Sorkar Jylla sha ka HANS Foundation ba kan pyniaid ia ki 15 tylli ki Sub-Centre ka Tnad ka Koit ka Khiah, kiba don hapoh ka District.
Kine ki 15 tylli ki Sub-Center ki dei kiba hap hapoh ka Mawlasnai PHC, Mawhati PHC, Umden PHC, Byrnihat PHC, Patharkhmah PHC, Umsning CHC, Pathsrkhmah CHC, Kyrdem PHC, Umsning CHC.
Kine ki kynthup ia ka Tyrso S/c, Thadrang S/c, Sohphoh S/C, Sonidan S/C, Umshaken S/C, Pillingkata S/C, Amjong S/C, Killing S/C, Tasku S/C, Kyrdem Kulai S/C, Mawlang S/C, Umsohphria S/C, Mawbseiñ S/C, Raitong S/C Bad ka Umtari Sub-Center.
Haba iakren bad ki lad pathai khubor hadien ka jingiakynduh ia u DMHO, u Working President ka HITO-Ribhoi Bah Aiborlang Nongrum ula pynpaw ia ka jingbynniaw ba ka Sorkar kala aiti ia kine ki Sub Centre sha kane ka kompani shimet khlem ka jingiatip lang jong u paidbah.
“Ha ka jingshisha, hashuwa ba ka sorkar kan aiti ïa ki Sub-center ka ladei ban pynbna shwa sha ki paidbah, hynrei mynta Sorkar ka la shu aiti sop sop sha ka HANS Foundation khlem ka jingïatip u paidbah” ula ong.
U iathuh ba ha ka jingiakren bad u DHMO, la pyntip ba ka jingaiti ia kine ki jaka sumar sha kane ka Foundation kan wanrah ia ka jingmyntoi ia u paidbah khamtam ha ka iohkam iohjam bad kiwei kiwei. “Watla katta ruh, ka Sorkar kala dep ban da pyntip shuwa ba kan shim ia kane ka sienjam” ula ong.
Ula ong ba ka Seng kan sa shong bishar ia ka Memorandum of Understanding (MoU) bala iasoi hapdeng ka Tnad ka Koit ka Khiah bad ka HANS Foundation hashuwa ba kan shim ia kino kino ki sienjam kiba bud.
