Shillong Nailur 21: U Deputy CEM ka Khasi Hills Autonomous District Council u Bah PN Syiem ha ka sngi Palei, ula ong, ka sorkar jylla lyngba ka tnad District Council Affairs kala pan jingpynshai na ka Council halor ka jingmih ar tylli ki kyntien “Clan” ha ki ar tylli ki Bill jong ka KHADC.
U Bah PN Syiem haba iakren bad ki nongthoh khubor ula ong ba ka sorkar jylla kala pan jingshai na ka KHADC halor ka jingiatyngkhuh ka ktien Clan ha ki ar tylli ki ain jong ka Council, ka Khasi Social Custom and Lineage Act bad ka Clan Act.
Ula ïathuh ba ka EC kala dep aiti sha ka Committee kaba kyrpang kaba la khlieh da u MDC ba shu thung u Bah Bindo M Lanong bad kila dep shong ia ki jingïalang ban pynbeit ïa ki jingai jingmut ka DCA ba ka don ki jingïatyngkhuh ki katto katne ki bynta.
U Bah Syiem ula ong, ba ka EC kala dep ioh ia ki jingai jingmut na ka Committee, kumta, mynta kin sa rah ia kitei ki jingai jingmut hapoh ka dorbar ban ïoh ïatai sani bha hashuwa ba ka KHADC kan phah biang sha ka Sorkar jylla.
