Shillong, Nohprah 07 : Ka Iingkashari Meghalaya High Court hynne ka sngi Balang kala ai da ka Rule of Contempt (ba pan jingshai halor ka jingpynkhein hukum) pyrshah ia u Superintendent of Police ka East Jaintia Hills District, hadien ba ka kaiphod kala pynpaw ba ka don ka jing jingtih tuh ia u dewiong hapoh ka District.
Ia kane ka hukum la pynmih da ka Full Bench jong ka Iingkashari ba kynthup ia u Chief Justice Sanjib Banerjee, kaba la pynshong nongrim ruh kat kum ka kaiphod bala pan da u Justice BP Katakey na u Deputy Commissioner ka East Jaintia Hills halor ka khubor ba ong ba “Ka Krem ha Jaintia Hils ka don hapdeng ka jingma namar ka jingtih pathar ia u dewiong”.
Ka kaiphod bala aiti da u Deputy Commissioner ha ka 3 tarik Nohprah, kala pynpaw ba ka don ka jingpyrshang ban tih tuh ia u dewiong ha ki por bala leit noh kynthup ka jingpynbthei bomb, kaba la buh jingma ia ka Krem Lait Prah kaba don ha ka Shnong Shnongriam, East Jaintia Hills.
U Deputy Commissioner ula pyntip ruh ba ula dep pynmih ia ka jingthah sha ki Magistrate ba kin leit jurip man ka por bad ban pynjari ia ki hukum kat kum ka kyndon 144 Criminal Procedure Code, 1973.
“Kaei kaba paw ka long ba wat hapdeng ki hukum jong kane ka Iingkashari namar ka hukum khang tih dewiong jong ka NGT bala pynksan ruh da ka Iingkashari Supreme Court, ka jingtih dewiong beain ka dang iai bteng ha Jylla kaba lah ban long ruh da ka jingiadon bynta lang ki bor sorkar bad wat ka jingpynshlur” ong ka Iingkashari.
Ka Iingkashari kala bthah “Namar ki hukum bala dep pynmih dang shen da ka Iingkashari kala pynpaw ba ki Superintendent of Police kin ngat ha ka Comtempt of Court (jingbishar ba pynkhein hukum) lada dang shem iaka jingtih dewiong beain lane khaii beain ha u pud u sam jong ki, ai ba ka Rule of Comtempt yn ai pyrshah ia u Superintendent of Police ka East Jaintia Hills haba pynshong nongrim kat kum ka kaiphod ba 3 tarik Nohprah 2022 jong u Deputy Commissioner kane ka juh ka District”.
U Justice Katakey ula aiti ruh ia ka intereim report ba khyndai ha ka jingshong bisahr ia ka PIL ba iadei bad ka jingtih dewiong beain hapoh ka Jylla.
Ha kane ka kaiphod u Katakey, la ong ba hashuwa ka jingpynjari ia ka hukum khang tih dewiong, ka jingdon jong u dewiong bala dep tih lypa ka long 19,54,258.816 MT bad kynthup ia ka (1)East Jaintia Hills – 8,90,670 MT (2) West Khasi Hills – 3,86,253 MT (3) South Garo Hills – 3,77,790 MT (4) South West Khasi Hills – 2,99,545.816 MT.
“Kaei kaba paw ka long ba nalor une u dewiong bala dep tih lypa bad bala thew kata 19,54,259 MT, la shem ba ka dang don ruh ka jingtih bad khaii tuh haduh 13 lak MT ia kaba ka Jylla ka pyrshang ban batai ba u dei u dewiong bala dep tih shuwa ka jingkhang ka NGT” ong ka Iingkashari.
Kala bynrap “Kam don ka jingartatien ba u don u dewiong ba tam nalor u dewiong ba 32.56 lak MT bala pynpaw da u Chief Secretary ha ka kaiphod ba 20 tarik Nailur,2022. Namar kane, u Justice Katakey ula ai jingmut ban ring video da ki drone bad halor kane la pynlong ruh ia ka jingialang ha ka 2 tarik Nohprah, 2022”.
Haba iadei bad ka jingkhaii bad jinglilam ia u dewiong bala dep tih lypa, ka Iingkashari ka ong ba ka kam ka dei ban iaid kumba la plan.
Kala bthah ruh ba ia ki jingbthah bala pynmih da u Justice Katakey dei ban bud thikna bad ban ring video ruh da ki drone nalor ban shondur kumba ula ai jingmut ia kaba dei ban pyndep khlem da pynslem shuh.
Ka Iingkashari kala buh ban shong bishar biang ia kane ka kam ha ka 7 tarik u Rymphang 2023.
