Shillong, Nohprah 12: Hadien baka Sorkar ka ai jaka biang sa 1.4 acres ban kynriah iaki 342 tylli ki tyllong ing na Them Iew Mawlong, ka Hynniewtrep Youth Council (HYC) kala dawa naka Sorkar Jylla ban pynshai ia kita ki longing bad katno ngut ki don ki nongtrei jong ka tnat Shillong Municipal Board (SMB) bad kiwei ki ba trei ha kiwei ki tnat Sorkar.
Haba kren sha ki lad pathai khubor u president ka HYC u Bah Roykupar Synrem ula pyntip ba ka seng ka pyrshah jur ia ka jingai jaka biang ban shna ing iaki briew kiba sah beain ha Them Iew Mawlong.
U Bah Roykupar ula ong ba ki don shi bun ki Khasi ki bym don jaka ban shna ing sah bad naka liang ka Sorkar Jylla haka jingshisha kadei ban pynbeit shwa iaka jingeh ki trai Ri trai muluk, ym ban ai jaka iaki ba sah beain ha Them Iew Mawlong.
Ula iathuh baka seng kala pynkhreh ban lum khana sumari (Survey) da lade ban lap ia kita ki 342 tyllong ing naka bynta ban pynthikna ba tang ki nongtrei ka SMB kin ioh jaka sah ha kane ka lynti ban kynriah iaki ba sah ha Them Iew Mawlong.
Ula ong ba ka seng ka sngewkhia halor ka jingbym shai iaka nongrim baka Sorkar Jylla ka ai jaka duh shaki jaidbynriew Harijan, lane kan dei tang ka jaka sah shipor naka bynta ki nongtrei SMB bad kiwei kiwei ki nongtrei ki tnat Sorkar.
U nongialam ka HYC ula pynrem jur iaka Sorkar Jylla kaba khien khun khatduh daka ba ai jaka sah iaki nalor ba kila ioh lypa ka bai ing “Housing Allowance”.
Nalor kane u Bah Roykupar ula pynrem iaka Sorkar daka ba kam ba ka Sorkar Jylla kam shym la lah ban tehlakam iaka jingwan buhai shnong beain ki briew ha Them Iew Mawlong bad namar ka jingkoh nguh katba ong ki jaidbynriew Harijan haba iadei bad ki kyndon ban kynriah na kane ka jaka.
