Shillong, Jymmang 16: Ka seng Confederation of Ri-bhoi People (CoRP) hynne ka sngi Nyngkong, kala iakynduh ia u Syiem ka Hima Mylliem ban pan jingpynshai halor ka jingpyrshah ka Raid Kharpati iaka jingthung Rangbah Shnong ia ki dkhot lane nongialam seng bhalang.
Haba kren bad ki lad pathai khubor u President ka CoRP bah Bandari Ryntathiang ula iathuh ba ka Raid Kharpati ka pyrshah ia ka jingthung Rangbah Shnong ia 2 ngut ki Nongialam Sengbhalang wat lada la dep jied ia ki ban long kum u Rangbah Shnong da ki nongshong shnong.
U bah Bandari iathuh ba ki 2 ngut ki Rangbah Shnong kiba la shah khot iakren haka Hima Mylliem ki long u bah Belarius Rongpeit, Rangbah Shnong ka shnong Umshakait u ba dei u dkhot ka CoRP bad u bah Jaram Hanse u Rangbah Shnong ka shnong Khamar.
“Katkum ka jingiakren bad u Syiem ka Hima Mylliem kine ki 2 ngut ki Rangbah Shnong ki ba long ruh ki nongialam sengbhalang ki khlem pynkhein satia ia ka kyndon namar iaki la jied hi daki paidbah nongshong shnong jong ki 2 tylli ki shnong” la ong u bah Bandari.
U bah Bandari Ryntathiang ula iathuh ba katkum ka jingiakren bad u Syiem ka Hima Mylliem, ka khlem don ka aiñ lane ka jingkhanglad ban long Rangbah Shnong da ki nongialam sengbhalang.
Halor kane u bah Bandari Ryntathiang ula kyntu ia ka ophis ka Hima Mylliem ban pynbeit noh ia kane ka jingpynsngewthuh bakla bad ba kam dei shuh ban nang iai jia nangne shakhmat.
