Shillong, Jymmang 16 : U Myntri Rangbah ka Jylla Conrad K Sangma hynne ka sngi Ba-ar ula pyntip ba ka Sorkar Meghalaya bad Assam kin sa shong iakren pynbeit pud jong ka wat kaba ar ha kine ki artaiew ban wan.
U Conrad ula ong ba ka Sorkar Meghalaya kala iakren man ka por bad ka Sorkar Assam halor ka jingjia kaba jia hapoh ka shnong Khanduli. Ula pyntip ba ka jingialang bad ka Sorkar Assam kan sa long khlem pep shuwa ban kut une u bnai Jymmang.
“Ngi la iarai lang ban don ka jingiajurip lang ha ki jaka kiba jur ka jingiakynad ban wanrah ia ka jingshngain jong ki paidbah bad ruh ban kyntu ia ki bor District, ki nongshongshnong bad ki Ophisar ba khmih ia ki thain ba kin kiar na kino kino ki kam kiba lah ban wanrah ia ka jingiakynad” ong u Conrad.
Lah ban kdew ba ha ka 11 tarik Jymmang, ki paid Karbi bad ki Khasi-Pnar kila poi sha ka jingiaktah kti bad ialun maw ha Khanduli bad artylli ki sem kila shah wiang ding.
Kane ka jingiakynad kala jia hadien ba ka Dorbar Shnong Khanduli kala pyrrkhing ia ki Karbi ba kin iaid lyngba ka Shnong. Kane kala jia ruh hadien ba ka kynhun ki Karbi kila byrngem ia ki Khasi-Pnar kiba leit shaki jaka rep.
Ha kane ka jingjia, ka kali u Superintendent of Police ka West Jaintia Hills kala shah lun maw ha ki paidbhur. U SP ula lait phet da ka said hynrei ka kali jong u kala julor ha kane ka jingjia.
