“Ngim pat ioh ia ka pisa ba bat kali iakhun Covid-19 bad Elekshon MLA haduh mynta”
Nongpoh, Jymmang 16 : Ka Joint Action Committee (JAC) jong ka All RFibhoi Passenger’s Vehicle (ARPV), kala byrngem ban kyntait noh ia ka jingai ia ka jingiatreilang bad ka Sorkar Jylla nangne shakhmat haba ka Sorkar ka donkam ia ka jing shakti jong ki kali kamai, namar ka jingbym pat siew pynkhuid ia ka bai kali bala bat ban pyndonkam ha ka jingiakhun pyrshah ia ka khlam Covid-19 bad kumjuh ruh ha ka jingpyniaid beit iaid ryntih ia ka elekshon MLA ba dang shu dep.
Ka JAC-ARPV kala pyntip ia kane hakhmat u Deputy Commissioner ka Ri-Bhoi District Arpit Upadhyaya hynne ka sngi Ba-ar, haba leit dawa ia ka bor District ban pyllait noh ia ka jingsiew ba dei ban ai sha ki nongniah kali kamai kiba la bat da ka Sorkar ha ka jingiakhun ia ka khlam Covid-19 bad ka elekshon MLA ba dang shu dep.
Ka JAC-ARPV bala ialam da u Chairman Bah Bines Markri bad Secretary Bah Vincent Sohkhwai, kala dawa ia ka bor District ban pyllait noh mardor ia ka jingsiew bai kali sha ki kali bala bat da ka Sorkar, kaba la sahteng la bun bun bnai mynta.
“Ka JAC ka sngewdiaw halor ka jingleh jongka Ophis u DC ban bat ia ka pisa kaba dei ban pyllait sha ki nongniah kali kamai bala pyndonkam da ka Sorkar ha ka jingiakhun ia ka khlam Covid-19 bad ka elekshon…Ka jingpynslem ka Sorkar ban pyllait ia ka pisa jong kine ki kali kala ktah haduh katta katta ia ki trai bad ki nongniah kali kamai” ong u Secretary ka JAC haba iakren bad ki lad pathai khubor.
Kat kum ka jingong jong u, ka bor District kala bat haduh 400 tam ki kali ban pyndonkam ha kaban beh ia ka kam elekshon MLA ba dang shu dep hapoh ka District hynrei wat hadien saw bnai duna, ka Tnad kam shym la pyllait satia ia ka pisa jong kine ki kali.
“Kane ka long ruh kumjuh ia ka Tnad ka Koit ka Khiah kaba la bat ia bun tylli ki kali ha ka jingiakhun ia ka khlam Covid-19 hynrei mynta la palat 2 snem, ki kali kim shym la ioh satia ia ka bai kali” ula ong.
Haba kylli, u Bah Vincent ula pyntip ba u Deputy Commissioner ula ai ka jingkular ba ia ka bai kali elekshon yn sa pyllait noh hapoh ka 15-20 sngi ban wan.
Kat kum ka shithi bala phah sha u Deputy Commission, ka JAC ha ka jingialang bala pynlong ha ka 16 tarik Jymmang kala shim ia ak rai ba kinsangeh noh ban ai ia ka jingiatreilang bad ka Sorkar ha kino kino ki khep kiba ka Sorkar ka donkam lada ka Ophis u Deputy Commissioner ka dang pynslem ban siew ia ka bainong jong ki kali kiba la shim ban pyndonkam da ka Sorkar.
