Shillong, Jymmang 16 : U Myntri Rangbah ka Jylla Conrad K Sangma hynne ka sngi Ba-ar, ula pyntip ba kam pat shym don satia kano kano ka rai ban ai shuki Myntri Sorkar ia uwei na ki arngut ki MLA ka PDF kiba la wan bynraplang bad ka NPP dang shen.
“Kam pat don satia ka rai halor kane. Kine baroh ki dang dei tang ki jingantad” ong u Conrad haba iakren bad ki nongthoh khubor haba jubab ia ka jingkylli la ka UDP kan duh noh ia kawei ka shuki Myntri ban ai jaka ia u MLA ka PDF ban shimti ia ka shuki Myntri.
U Conrad uba dei u National President ka NPP ula ong ba ka result jong ka Elekshon ha Sohiong kan nym don jingktah eiei ia ka jingiadei hapdeng ka NPP bad ka UDP.
“Em, lada ka dei ban don ka jingktah (jingiadei), kan jin da la ktah naduh ka elekshon MLA 2023. Wat ha ka elekshon2023, kila don shibun ki kyntien bala pyndonkam ban kynthoh hynrei ngi dang iai bteng ban neh kum ki paralok ha ka Sorkar MDA” ula ong.
“Ngi la kren ruh ha ka por elekshon wat ha ka elekshon MLA 2023 ruh ba lada phi phaidien sha ka elekshon, ngin la iawan lang hajuh bad ngi la ban jur halor ka jingshisha ba ngi la iatreilang ha kine ki san snem bala leit ban pyniaid shakhmat ia ka Jylla bad ha kane ka juh ka nongrim ngi kwah ban pynbteng” ong u Conrad.
