Shillong Nailur 29: U Myntri Rangbah ka Jylla Conrad Kongkal Sangma hynne ka sngi palei, ula ong ba baroh ki lah ban ai iaki jingai jingmut jong ha kano kano ka bynta ban pynkylla iaki kyndon jong ka Meghalaya Regulation of Gaming Act (MRGA), 2021.
“Ka dei ka aiñ kaba suk kaba kren shaphang ka Offline bad Online Gaming kumta ban pynkylla eiei ia katei ka mat, kam da don than bad kam don eiei hi ruh ban pynkylla eiei. Hynrei lada don kano kano ka bynta kaba dei ban pynkylla, kumta mano mano ki lah ban ai jingmut, hynrei kumba long mynta hi kam don kano kano ka bynta kaba donkam ban pynkylla” ong u Conrad K Sangma haba jubab iaka jingkylli jongki nongthoh khubor, la ka sorkar jylla ka don jingthmu ban pynkylla ia ki kyndon jong katei ka aiñ khalai hadien ba kala don, ka jingdawa ba dei ban pynduh noh ia ka MRGA, 2021.
Katei ka jingdawa kala mih hadien ba bun kiba don bynta bad kiba don iaka jingsngewkhia naduh ki nongialam Niam, ki sengbhalang kila pyrshah jur iaka jingthmu ka sorkar jylla ban buh ia ka jaka khalai Casino ha Ri Bhoi District.
U Myntri Rangbah u la iathuh ba ki 3 tylli ki Provisional License kiba lah ban treikam tang 6 bnai ban tei ia ki Casino, kila kut bad kila iap noh hynne ka sngi.
“Kila don kumba 10-15 ngut kiba la aplai kiba dang don bad ngi mynta hynrei ym shim la pyniaid shakhmat iaki, namar ngi lah dep ban ong, ba ngin ym iaid shakhmat lada ngim ioh iaka jingmynjur na ki paidbah. Kitei ki 3 tylli ki Lisen kidei kiba la ai naduh ka 29 tarik u Lber, kaba la long kham hashwa ba kan don ka jingiatai nia kaba la sdang ha u bnai Jymmang (ban pyrshah ia ki Casino). Ha katei ka por, la pyniaid ia ki kam ki jam da ka jingthmu ban kyntiew iaka jingiohlum khajna bad ban pynthikna baka jingleh khalai kadei ban long thik ha ki jaka kiba la buh” ong u Conrad.
“Kum u Myntri Rangbah nga lah dep ban ai iaka jingkren bad nga tharai ba ka jingkren ka jong nga dei ban shimkhia da baroh ki briew kiba don ka jingartatien bad kidei ban ngeit ba ka jingkren u Myntri Rangbah hapoh ka ïing dorbar thawaiñ ka jylla ka mut bad ka long kaba shisha” ong u Conrad.
U la ong, kan ym don kano kano ka jingthmu ban pynduh noh iaka aiñ khalai namar kane ka aiñ kan pyrkhing ia ki jingialehkai khalai kiba la don lypa hynrei ia mynta, la pynsangeh pat iaka jingthmu ban don shuh shuh ia ki jingialehkai khalai kiba thymmai bad yn ym iaid shakhmat katba ym pat ioh ban iasyllok bad baroh kiba don bynta bad ban peit iaka jinglong jingman bad ban shim ia karai kumno ban leh nangne shakhmat.
“Baroh kiei kiei la pynsangeh lut bad nga lah dep ban kren ia katei hapoh ka ïingdorbar thawaiñ ka jylla, nga tharai, kito baroh kiba don bynta bad ki paidbah ne ki riewshimet ne ki kynhun kidei ban shimkhia bha iaka jingkren ka jong nga” ong u Myntri Rangbah ka jylla.
Ula ong, ka jingthmu jong ka sorkar, ka long ba iaki jaka khalai dei ban don ha khappud bad ka nongbah Guwahati ba kan ym ktah iaka jylla baroh kawei bad ban ioh ruh iaka khajna lyngba ka GST kaban kot ia kumba T.500 – T.600 Klur.
