Shillong, Risaw 31 : Ka Village Defence Primary Committee Nongstoin Area (VDPCNA) kala kyrpad ia ka jingtuklar lem jong ka Director General of Police (DGP) Kong Idashisha Nongrang halor ki jingeh ba iakynduh da ka Committee ha ka jingiarap ia ki Pulit ban tehlakam ia ki kam bymman bad pynneh ia ka shongsuk shongsain ha ka thain.
Ka VDPCNA kala aiti ruh da ka dorkhas halor kane ka kam sha ka DGP ha ka jingiakynduh ba long hynne ka sngi Palei ha Police Headquarter.
U President ka VDPCNA Bah Mawkordor Kharsyiemlieh ula ong ba ka Committee kala iakynduh ia shibun ki jingeh naduh ba la seng ia ka ha u snem 2019.
Ula ong ba ka VDPCNA kala trei shitom bha ban pynduna ia ki kam bymman bad ki riew runar hapoh ka thain bad kala iatreilang khlem sangeh bad ka Tnad Pulit ka West Khasi Hills ban kem ia ki riew runar.
“Ngi la ju iapynlong lang ia ki jingiaid pahara bad ka Tnad Pulit hapoh Iew Nongstoin, ha surok NH bad ka thain By-Pass kaba ju mih ki huri hura. Watla ki jingpyrshang kat kaba lah, katto katne ki kam bymman bad ki jongpynthut ia ka suk ka sain ka dang iai bteng, kaba buh hapdeng ka jingeh ia ka VDPCNA” ula bynrap.
Haba kyrpad ia ka jingdonkam ban pyllait noh ia ki dkhot ka VDP na ka kam lei tai sakhi, u bah Kharsyiemlieh ula ong “Haba ka VDPCNA ka kem ia ki nongkhaii droks ne kyiad bad aiti ia ki sha ka tnad Pulit, ki dkhot jong ngi ki ju shah khot kum ki nongai sakhi ha kine ki kam. Kane ka buh ha ka jingeh namar ki dkhot bad volunteer jong ngi ki don ruh iala ki jong ki kam ban beh ha kaban kyrshan iala ka iing ka sah. Namar kata, ngi kyrpad ban pyllait noh ia ki dkhot ka VDPCNA na ka jingleit ai sakhi bad ba ka Tnad Pulit kan shim ia ki sienjam ba donkam halor kane ka kam”.
Ula ong ba ka Committee kala kyrpad ruh ban pynioh ia ki uniform kiba don ia ka kyrteng VDPCNA khnang ba kan iarap ban pyniapher ia ki dkhot jong ngi na ki riew paidbah haba bynrap “Kane kan pynshlur ruh ia ki ha ka por leit khynra bad iaid pahara”.
Ka Committee kala kyntu ruh ia ka DGP ban khmih halor ka jingpynslem ban pyllait ia ka honorarium sha ki dkhot jong ka VDP.
“Kiba bun ki VDP Unit ha ki Shnong ki thaw ki dang ap ban register naduh u snem 2010, kaba khang lad ia ki ban ioh ia ki honorarium, ki tiar ki tar bala ai da ka Tnad Pulit” iathuh u Bah Kharsyiemlieh.
Haba pynpaw ba ka VDPCNA kala aiti met bad mynsiem ban leh eiei pyrshah ia ka jingdih droks, jingdih kyiad ha jaka paidbah, ka jingia shoh iadat bad ki kam bymman, kaba ju jia hapdeng eh jong ka sor Nongstoin, ula ong “Ngi tyrwa ban don noh ka jingiaid pahara miet manla ka sngi ha ki surok ka sor Nongstoin, ban pyndait ia ki kor CCTV bad ban pyrrkhing tyngeh ia ka jingdie kyiad beain”.
