Shillong, Nailur 20: Ka Sorkar Meghalaya kala pan ia ka jingkyrshan na ka Sorkar Pdeng ban pynkha ia ki Anganwadi Centre ha palat 1500 tylli ki Shnong ha kylleng ki jaka ka Jylla.
Haba jubab ia ka jingkylli bala wanrah da ka MLA ka AITC na Ampati Miani D Shira ha Iingdorbar, u Myntri ka Tnad Social Welfare bah Paul Lyngdoh ula ong “Ngi la dep phah ia ka jingtyrwa sha ka Ministry of Women and Child Development ban kdup lut noh ia baroh ki shnong ki bym pat don ia ki Anganwadi Centre”.
Kat kum ka jingong jong u, ka Sorkar kan sa lah ban pynkha ia ki Anganwadi Centre ha ki shnong ki bym pat don, hapoh kane ka 1-2 snem ban wan.
Ula ong ba ki1500 tylli ki shnong ki bym pat don ia ki Centre, kila don hapdeng ka jingpynbeit hapoh ka Early Childhood Development Programme.
U Myntri ruh ba khyndai tylli ki application la ioh pdiang na East Khasi Hills marwei ban buh noh ia ki main Anganwadi Centre bad 27 tylli ki mini anganwadi centre.
U Bah Paul ula pyntip ruh ba un sa lum ia ka jingialang bishar ia ka rukom treikam jong ki anganwadi centre ba don mynta ha kylleng ka Jylla, ka ban long ha u bnai Risaw. Ula kular ruh ban khmih ia ki jingeh jong baroh ki dkhot haba iadei bad kine ki Centre ha ka jingialang bishar kam ban wan.
U MLA ka Congress na Mawhati Bah Charles Marngar u kwah ban tip ba kaei kaba jia ia ki rice cooker ba ai sha ki anganwadi centre khlem ka jingdon bording elektrik katba u MLA ka Umsning Dr Celestine Lyngdoh ula kyrpad ia ka jingdonkam ban pynthikna ia ka jingpynpoi umbam umdih sha ki centre katba u MLA ka Amlarem Bah Lahkmen Rymbui ula ban jur halor ka jingdonkam ban don ka jingiatreilang hapdeng ka Tnad Social Welfare bad ka Tnad ka Koit ka Khiah lem bad ka Tnad Education na ka bynta ka jingheh jingsan ba thikna jong ki Khynnah hapoh ka Jylla.
