Shillong, Naitung 26 : Ka jingpoi ki nonghikai ban iakhun eksam Megalaya Teachers Eligibility Test 2026 kala kot palat 95% ha ka 24 tarik Naitung ha ki 58 tylli ki centre ha baroh ki district bad sub-division ka Jylla.
Kat kum ka jingkhein, ha kane ka eksam bala pynlong da ka Directorate of Educational Research and Training (DERT), haduh 95.23% na ki 23,101 ki nonghikai ba aplai, kila poi thoh ia ka eksam Paper I na ka bynta ki klas I-V katba 95.89% na ki 22,821 ki nonghikai kila wan thoh ia ka eksam Paper II na ka bynta ki klas VI haduh VIII.
Ka MTET ka dei ka kyrdan ba kongsan bala buh da ka National Council for Teachers Education (NCTE) ha ka jingthungkam ia ki nonghikai jong ki klas I haduh VIII.
Ki Ophisar ka DERT ki pyntip ba kane ka jingpoi bun ki nongiakhun ia ka eksam ka pyni ia ka jing kwah bad ka jingaiti lut jong ki nonghikai ba don ha ka kam ba kin pass ia ka test.
Ia ka eksam la pynlong ha ka rukom kaba khuid bad kaba shai, ong ka Directorate, haba bynrap ba ia ka result yn sa pynbna ha ki khyndiat por ban wan.
