Shillong Premier League | Da ka said pynliem ka Langsning ia ka Sawmer, lashai yn iakhun ka Nongkseh bad Mylliem

Shillong, Naitung 26 : Kampher wat hadien ba kum ka kynhun ka la pynkhlain bha ialade, pynban ka Langsning FC ba la coach da u bah Khlain Pyrkhat Syimelieh, ka la shu lah da ka said ban pynliem iaka Sawmer SC ha ka jingiakhun sdang jong ka lympung Shillong Premier League (SPL), ha ka janmiet sngi Saitjain, ha SSA Stadium, First Ground, Polo.

Ia kane ka shi kol ka Langsning FC la thep iaka ha ka minit ba 81 da u Kyrmenskhem Mukhim.

Kumban shu pynkynmaw ba kane kan dei ka sien ba 15 jong ka lympung ialehkai ka SPL, ha kaba ki rang ialehkai kiba tbit ba kynsai na kylleng sawdong ka jylla, ki juh ioh ban iakhun daka jingiasoi ne ban ialehkai na ki klob ba ioh ban iakhun ha kane ka lympung, ia kaba la plié iaka da ki dkhot nongkit kam ba rangbah bad kiba hakhmat jong ka SSA, kiba la hiar shapdeng ka madan iakhun ban ai iaka kitbok ka kitrwiang ia ki player jong baroh artylli ki kynhun.

Kum ka kynhun, ka Langsning FC mynta ka samoi ka la ialeh ban nang pynkhlain bha iaka la ka kynhun kum shi bynta ban iakhun ruh ha ka lympung ialehkai ba la rim tam ha ka dewbah Asia, ka Durand Cup 2026, ha kaba la shem ba ki rang ialehkai ba dang shu wan ban pyniasnoh bad ka kynhun ki dang donkam bha ka por ba kin lah ban ia mir jingmut bad ka kynhun ialehkai hi baroh kawei.

Uwei na ki rang ialehkai uba ka klob ka dang shu soi thymmai u Syed Ahmed, u la don bynta lang naduh kaba sdang bad ka kynhun ha kaba um pat shim la lah ban da pynpaw than ia kata ka snap ialehkai, ha kaba ka kabu ksiar kaba kham paw shynna bha ia u ban pynkhih iaka jar ka dei ha ka minit ba 69 hadien ba u Kyrmen u la pynbuh sha u ia ka kol hajan ka kol, kaba hangne kumba kyndit haba wan kane ka bol, u la klumar jingmut pynban kumno ban leh ia ka bad kane ka kabu ka la shu bijai ei.

Nalor kata sa u Samuel L. Kynshi ruh, u la ioh lem ia ki kabu kiba um shim la lah ban pynurlong ia ki sha ki kol

Haba wan ban bteng iaka kylla miet, ka Sawmer ka la ioh ia ki kabu ban shut ia ki freekick, hynrei kam shim la lah ban pynkylla pat iak sha ki kol.

Dei tad ynda haba ka jingiakhun ka la nang jam sha kaba kut, ba u Kyrmenskhem, u la khyrwit jam iaka bol bad ioh ban pynkhih iaka jar.

Ka jingiakhun kaba ar naka jong kane ka lympung la buh ba kan long pat lashai ka lah sngi u Blei, ha kaba ka kynhun ialehkai ka Nongkseh SCC kan mih madan ban aireng pyrshah ia ka Mylliem kaban long ha ka por 6:30 baje janmiet.

Kane kan dei ka samoi ialehkai ba ar iaka Mylliem ba kan iakhun ha kane ka lympung, kaba ha ka samoi kaba la dep ka la shu lait ler ba kan hiar noh na kane ka kyrdan iakhun, kaba mynta ka samoi la khmih lynti ba kum ka kynhun, ka Mylliem kan kham kyntiew ia la ka rukom ialehkai kampher wat lada kan long kaba eh iaka ban ong ba kan lah ban jop iaka Nongkseh kaba ha ka samoi ialehkai ba la dep, ka la lah ba kan khur ia kiba bun tylli ki nam jop.