Shillong, Nailur 14: Palat 8805 ngut ki riew bymman kila shah kem halor ka jingdonkam ha ki kam bymman bapher bapher kynthup ia ka jingthombor pyrshah ia ki Kynthei bad ki Khynnah ha Jylla ha kine ki san snem bala leit noh.
Ia kane la pyntip da u Myntri kam Pohiing ka Jylla ma Lahkmen Rymbui haba jubab ia ka jingiatai ba lyngkot halor ka jingshong shngain jong ki paidbah ha ka Jylla, kaba la wanrah da u Chief Whip ka Liang Pyrshah bad MLA ka Umroi Bah George B Lyngdoh hynne ka sngi balang hapoh ka Iingdorbar.
U Ma Lahkmen ula ong ba ka Jyla kala sakhi ia ka jinglong jingman ba palat 3000 tylli ki case la register manla u snem ba kine ki san snem bala leit noh.
Ki case bala register ki bun eh ki kam bymman kiba hap ha ka kyrdan pyniap briew, rahbor, kam thombor ia ki Kynthei bad Khynnah, ka NDPS case, NGT case bad ki kam prong tuh ia ki Iing ki sem.
Ha u snem 2018, haduh 3534 tylli ki case la register, ha u snem 2019-3885 tylli, ha u snem 2020-3735 tylli , 2021- 3425 tylli bad 2022 haduh mynta ka long 2291 tylli ki case.
U ma Lahkmen ula ong ba ki kam bymman kila jia namar kiba bun ki daw la ka dei ka jingduk, ki daw shimet jong ki nong leh bymman bad kam long satia kaba suk ban batai lypa ia kiei ki kam bymman ban leh da ki riew bymman hynrei ki Pulit naduh kiba rit haduh kiba heh, kila trei shitom ban pynthikna ia ka jingshong shngain bad ka jingim ba pahuh pahai jong ki Nongshongshnong.
U Myntri ula ong ba ki Pulit kila phikir bha haba phai sha ka jingtohkit ia ki kam bymman, kaba la paw na ka jinglah ban chargesheet haduh 5683 tylli ki case ha kine ki san snem bala leit noh.
Halor ki kam thombor pyrshah ia ki Kynthei bad Khynnah, u Myntri kam Pohiing ula iathuh ba naduh u snem 2018, haduh 1267 tyli ki case thombor ia ki kynthei la register hapoh ka Jylla bad 408 tylli ki case ba thombor ia ki Khynnah la register.
Haduh 1542 tylli ki case la register hapoh ka ain Prevention of Children against Sexual Offences (POCSO) naduh u snem 2018. Lada khein average, palat 300 tylli ki case la register naduh u snem 2018 haduh 2021.
U Myntri u pyntip ba haduh 1260 ngut ki nongleh bymman kila shah kem halor ka jingthombor pyrshah ia ki Kynthei bad ki Khynnah ha kine ki san snem bad haduh 1357 ngut ki nongleh bymman kila shah kem hapoh ka POCSO naduh u snem 2018.
Haduh 103 ngut ki nongleh bymman kila shah pynngat ha ki jingpynsajia ha kine ki snem.
