Shillong, Nailur 15 : Palat 36 tylli ki skul Lower Primary ha kylleng ki jaka jong ka Jylla ki dei ki bym don nonghikai satia.
Ia kane la pyntip da u Myntri ba khmih ia ka Tnad Pule ma Lahkmen Rymbui hynne ka sngi palei haba jubab ia ka jingkylli bala wanrah da u MLA ka Rangsakona Zenith Sangma hapoh ka Iingdorbar.
U ma Lahkmen ula pyntip ba kine ki Skul khlem Nonghikai kila mih namar ka jingshongthait, ka jingpynkynriah kam lane ka jingiehnohkam jong ki Nonghikai. Ki Khynnah skul kila leit mynta sha ki skul ba marjan.
“Ngi la mynjur ban pynbeit ia ka jingthung nonghikai..Ngi la ai jingbit ia ki SDSEO ka Mawkyrwat, Mawshynrut, Mairang, Nongpoh, Baghmara, Resubelpara bad kiwei kiwei ba kin pynbeit ia ka jingthung nonghikai ha ki skul ki bym don nonghikai” ula pyntip.
Haba pynpaw ia ka jingsngewkhia, u Zenith ula buh jingkylli halor ka jingbym lah jong ka Sorkar ban thung ia ki Nonghikai da ka contract ha kine ki skul ban pynthikna ba ki khynnah kin ioh beit ia ki jinghikai khlem sangeh.
Halor kane, u Myntri ula ong ba ka jingeh kala mih hapdeng ka jingiaid ka jingthungkam namar ka hukum ba dang shen jong ka Iingkashari Meghalaya High Court kaba bthah ban pynkhreh ia ka roster system.
“Ngi kyrmen ba ngin lah ban pyndep noh kham kloi ia kane. Ngi la pyrshang ruh ba khmih kat kum ki lynti ka ain la ka don ne em ka lynti ban shu thungkam shipor shuwa ia ki nonghikai” ula ong.
Ha kajuh ka por, u MLA ka North Shillong Bah Adelbert Nongrum ula pynpaw ia ka jingsngewkhia halor ka jingpynslem jong ka Sorkar ban thung ia ki Principal ba pura ha kumba 15 tylli ki skul Higher Secondary.
