Tura, Naitung 24 : U Myntri Rangbah ka Jylla Conrad K Sangma ha ka sngi Nyngkong, ula iakynduh ia ki Kynhun Sengbha lang ba iashong shah jingit shabar ka Chief Minister Office (CMO) ha Tura bad shong jingialang ia palat 3 kynta halor ka jingdawa Winter Capital bad jingdawa pyntreikam ia ka Roster System naduh ki snem bala leit noh.
Ha kane ka jingialang, u Myntri Rangbah ula kyntu ia kine ki Sengbhalang ba kin weng noh ia ka jingiashah jingit bad ban wan sahkhmat sha ka miej jingiakren kaba don jingmut. Ula ban jur ia ka jingkongdan ka jingiakren ha kaban pynbeit ia baroh ki jingeh bad jingsngewkhia khnang ban lah wanrah ia ka jingiasngewthuh jingmut bad jingpynbeit ia kiei kiei baroh.
Shuwa kane ka jingialang bad ka ACHIK, kiwei ki kynhun sengbhalang kila wan iakynduh ia u Myntri Rangbah ka Jylla ha Circuit House ban pynsngew iala ki jong ki jingsngew bad ban kyntu ia ka Sorkar ba kan khmih bad peit lem ia ki.
Ha kane ka jingialang, u Myntri Rangbah ula khot ia baroh ki seng ba iakhih da kaba kyntu ba kin wan iashimbynta ha ki jingia kren ba sani halor ka kam ba iadei bad ka jingwanrah ia ka Winter Capital bad ka jingpyntreikam ia ka Job Reservation Policy.
U Myntri Rangbah ula pyntip ba ia kine ki jingiakren yn pynlong ha ka jingiadonlang kiwei pat ki Myntri Sorkar lem bad kiwei kiwei ki Kynhun khnang ban pynthikna ha kaban ioh ia ka lynti ban iapynbeit da ka jingiasngewthuh jingmut.
Ula khot ia kine ki kynhun ba kin wan sha Shillong ha kaban iashimbynta ha kane ka jingialang. Watla ia ka Tarik ym pat shym la pynthikna, hynrei la shu buh ba ka Tarik ka lah ban long ha ka 8 lane 9 tarik Nailar.
