Tura, Nailur 02 : Palat 20,000 ngut ki khynnah pule ha kylleng ka Jylla Meghalaya kila ioh jingmyntoi na ka program SPARK ka Sorkar Jylla, ong u Myntri Rangbah Conrad K Sangma ha ka sngi Balang haba ai jingkren ha ka District Talent Event 2026 ha Tura.
Ka SPARK, kaba ieng na ka bynta ki prokram ki skul ha ka jinghikai ban nang kren bha bad ba shai ia ka ktien ka thylliej, ka jinglah ban ialeh ia ki jingeh bad ka jinglong ba sbun, ka thmu ban tei ia ka sap ha ka kren ka khana, ka jinglah ban weng ia ki jingeh, ka jingiatreilang kum ka kynhun bad kiwei ki sap ba donkam ha ka jingim hapdeng ki samla pule.
Haba kren sha ki khynnah pule, ki nonghikai bad ki kmie kpa, u Conrad ula ong ba ka Jylla kala kynshew bun bah ha ka kam pule dangle bad ki jingtei, katba ka SPARK ka dei pat kawei ka jingkynshew-kaba phaikhmat ha ka jingtei ia ka jing lah bor ki briew kaba ki samla ki donkam ban lah pyndonkam pura ia ki lad ki kabu ba ki ioh.
“Ki khynnah pule ki lah ban tip bha ia ka jubab bad ki dang iaksaid ban kylli jingkylli, ban batai ia ka jingmut, iatreilang hapoh ka kyndon, mad ia ki interview lane khyllie biang na ka jingshah rem. Kine kiei kiei kim ju kham paw ha ki mark sheet, hynrei ki saindur ba haduh katno ki khynnah ki lah ban poi ha ka jingim” ula ong.
Haba kynmaw iala ka jong ka jingshem, u Myntri Rangbah ila ong ba ma u ruh ula mad ia ka jinglong syier haba kren hakhmat u paidbah bad ba um don ia ka jingsngewskhem na kaei kaba pyni da ki khynnah ba iashimbynta ha ka rynsan.
“Ngim ju don ia ka prokram kum ka SPARK ban hikai bad btin lynti ia ngi” ula ong haba ai khublei ia ka kynhun SPARK bad ka Avenues namar ka jingpyntreikam ia kane ka prokram.
Ka SPARKS kala sdang ha u 2024 kum ka pilot project kaba kdup ia 5,143 ngut ki khynnah pule na ki 25 tylli ki skul Sorkar ha baroh 12 tylli k district, ha kaba 73% ki dei ki kynthei.
Hadien la kyrshan ia ka da ka jingbei tyngka lyngba ka Samagra Shiksha Abhiyan ka Ministry of Educaton, kaba la pynpoi ia palat 8000 ngut ki khynnah pule na ki 28 tylli ki campus. Ia kane ka prokram la ithuh da ka Ministry kum ka jingleh kaba biang eh hapoh ka National Education Policy.
Kat haduh ka 31 tarik Nailar, 2026, ka SPARK kala poi sah ki 12,078 ngut ki khynnah pule na ki 53 tylli ki campus ne jaka pule ha baroh ki 12 tylli ki District. Ki nongioh bynta ki kynthup ia 6,592 ngut ki kynthei bad 5,486 ngut ki shynrang.
U Myntri Rangbah ula pynshai ba ka SPARK kam shym la bujli noh ia ki jingkynshew pisa ka Sorkar ha ka higher education, skilling bad ka iohka iohkam. Hynrei, kala pynkhlain ia ka nongrim kaba khlain ka ban pynlong ia ki khynnah ba kin nang pyndonkam bha ia kum kine ki kabu.
