Williamnagar, Nailur 02 : Ka South Garo Hills kala pynlong da ka Non-Cooperation Movement (NCM) u paidbah ba arsngi, ha baroh kawei ka district ha ka sngi Ba-ar, ban dawa ia ka Sorkar ba kan maramot bad pyntrei noh mardor ia ka National Highway-62 kaba la jot rathai.
Ia kane ka jingiakhih la khot pynlong da ki kynhun Sengbhalang ka District ba kynthup ia ka Garo Students’ Union, South Zone; Federation of Khasi Jaintia and Garo People; ADE; AYWO; AHAM; NGCO; bad APA, nalor ki seng jong ki kali kamai kiba la ai ka jingkyrshan.
Ka surok NH-62 ka sdang na Negkra sha Bahhmara bad sha kiwei ki jaka ka South Garo Hills bad Baghmara sha Dimapara.
Kum shibynta jong kane ka jingiakhih, ki dukan baroh kila khang khyrdep bad ka iaid ka ieng jong ki kali ruh kala kynjah ha baroh ki jaka jong ka district.
Ha Siju, kidukan kila khang khyrdep lut bad la pyntip ba um don kawei ruh ka kali ka ban iaid ha ki surok.
Ha Baghmara, ka headquarter ka SGH, kiba bun ki dukan kila khang khyrdep bad ki surok kila thylli, lait noh tang ki katto katne ki kali shimet.
Kane kajuh ka jinglong jingman la sakhi ruh ha Nongal Bibra, ha kaba bun ki dukan kila khang khyrdep bad ym don satia wat kawei ruh ka kali heh ka ban iaid, lait ki kali rit jong ki riew shimet la shah ba kin iaid tang ha ki kam ba long kyrkieh.
Ki paidbah ka SGH kila mad iaka jingeh kaba la slem bha namar ka jingsniew palat ka surok NH-62, kaba dei ka surok kaba kongsan bha hapoh ka thain.
Kine ki seng kila pynpaw ba kane ka jingiakhih ka pyni ia ka jingbitar kaba nang jur hapdeng ki paidbah namar ka jingieh noh bein ia ka highway bad dawa ia ki bor khmih ba kin leh eiei noh mardor.
