Shillong, Risaw 09: Ka tnat Ministry of Education ka Sorkar Pdeng kala pytip ba ki don 168 tylli ki Primary School bad 101 tylli ki Upper Primary School ha Meghalaya kiba don tang hapoh 10 ngut ki khynnah skul.
Ia kane la pyntip da u Myntri ka tnat pule puthi Rakkam A Sangma haba pynpaw ba ka sorkar ka sngewdiaw bha halor kane ka jingduna ka jingpynrung kyrteng ki khynnah skul hapoh ki Lower Primary School bad haki Upper Primary School hapoh ka jylla.
“Kane ka jingkhein kadei bala ai da ka tnat Ministry of Education ka sorkar pdeng bad naka liang ka sorkar Meghalaya khamtam ka tnat pule puthi kala rai ban shimkhia halor kane bad kan wad bniah, kiei ki daw ban pynlong iaki khynnah ban pynrung kyrteng ialade haki Primary School bad haki Upper Primary School” la ong u Rakkam.
Haba kylli hato ka sorkar kan khang noh ne em ia kum kine ki skul kiba don tang hapoh 10 ngut ki khynnah skul, u myntri ka tnat pule puthi ula ong “Ka jingkhang noh iaki kum kita ki skul kam dei eh tang ka lad ban pynbeit iaka jingduna hynrei kadei shisha pat ka long ka jingsngewkhia ba ki duna palat ki khynnah kiba pynrung kyrteng haki Primary School bad Upper Primary School ha Meghalaya”.
U Rakkam ula ong ba ka tnat pule puthi kala dep ruh ban pynkynriah ia ki khynnah naki skul ba duna kiba pynrung kyrteng sha kiwei pat ki skul marjan hynrei ki don pat ki katto katne ki skul ha ki katto katne ki jaka kiba jngai naki shnong bad kum ia kita ki skul ka tnat kam lah ban shu kynriah ia ki khynnah.
“Naka liang ka tnat pule puthi kan hap ban wad bniah iaki daw ban pynlong ka jingduna ka jingpynrung kyrteng haki skul daka bap hah ruh iaki ophisar jong ka tnat ban jurip ia kum kita ki skul namar ki lah ban don shibun ki daw, kum ka jingbym biang ki kamra Class, ki nonghikai lane ki nongpyniaid skul bad kiwei kiwei de” ula ong.
