Shillong, Risaw 09 : Ka All Garo Hills SSA School Teachers’ Association (AGIISSASTA) ha ka sngi Nyngkong, kala aipor 7 sngi ia ka Sorkar Jylla ba kan pyllait noh mardor ia ka tulop ba sahteng, kaba long lai bnai pura.
Ha ka dorkhas bala phah sha u Myntri Rangbah Conrad K Sangma, ka AGIISSASTA kala ong “Ngi kyrpad rit ia phi ba phin sngewbha pyllait noh mar mar ia ka tulop ba sahteng jong ngi kaba la kot lai bnai kata naduh u Naitung haduh Nailur 2023”
“Lada ym lah ban pyllait ia kane ka tulop ha lane shuwa ka 16 tarik Risaw, 2023, kan pynbor ia ngi ban pynlong da ki jingiakhih paidbah na ka bynta ka bha ka miat jong ki nonghikai SSA kiba la mad ia shibun ki jingeh” kala bynrap.
Ka shithi kala ong ruh “Ngi ki nonghikai SSA ka Meghalaya ngi la trei ia ka kam da ka kpoh ba thylli naduh kine ki lai bnai bala leit noh kata naduh u Naitung haduh Nailur 2023. Ki Nonghikai kim shym la ioh ia ka tulop ba manla u bnai haduh mynta”.
“Ngi hap ban siew pynkhuid ia ka skul skul ki khun hapoh ka por kata shuwa ka eksam kut snem 2023” kala pynpaw.
Ka seng kala kyntu ruh ia ka Sorkar ban pyrkhat lem khamtam ba ka lehniam puja kala wan kumne bad ki nonghikai, kiba dei ki paid Hindu, ki donkam pisa ban lehkmen.
