Shillong, Nailur 26 : Ka Meghalaya kala pyntip ba ki don haduh 19,000 ngut ki briew kiba shah dait ksew manla u snem, bad ka East Khasi Hills kala kynjoh palat 5000 ngut bad 15 ngut kiba iap tang mynta u snem 2025.
Kaba ima ka long, ba bun na kiba iap ki dei kiba khein sting ia ka jingshah dait bad shah khlong.
Ia kane la pyntip ha ka jingialang ban rakhe ia ka World Rabies Day bala pynlong da ka District Joint Steering Committee for Rabies Elimination, East Khasi Hills ha ka jingiatreilang bad ka Health bad Veterinary Department, Shillong Municipal Board, ki NGO, ki Nongialam Shnong ha Lumparing Sports Club Indoor Hall ha ka sngi Thohdieng.
Ia kane ka jingrakhe la pynlong halor ka matpdeng “Act now: You, me and the community”, kaba ban jur ia ka jingdonkam ban iashimkhia lang ha kaban tehlakam ia ka jingpang rabies.
Haba kren ha ka jingialang kum u kongsan, u Myntri ka Tnad Animal Husbandry & Veterinary Bah Sanbor Shullai, ula kyntu ia ki nongshongshnong ba kin ai injek anti rabies ia ki jingri jingpet, ban sumar wut wut ia ki jingmong na ka jingddait ksew, bad kyrshan ia ka jingtehlakam ia ki ksew surok, haba ban jur ba ka jingpang rabies ka dei kaba lah ban iada 100 na ka shispah hynrei kaba lah pat bna shim ia ka jingim lada khein sting.
U PK Sangma, Additional Deputy Commissioner ka East Khasi Hills, ula pynpaw ia ka jingdonkam kyrkieh ia ki shnong ki thaw ban leh eiei ha kaban iada ia ka jingpang rabies, katba ka Dr RR Marak District Nodal Officer, NRCP, kala sam ia ki jingkhein halor ki jingshah dait ksew bad ka jingiap ki briew ha Meghalaya.
Kala pyntip ba ha Meghalaya, palat 19,000 ngut ki briew ki shah dait ksew manla u snem, bad palat 5000 ngut na East Khasi Hills bad 15 ngut kiba iap tang mynta u snem.
Kane ka prokram ka kynthup ia ki jingialap pynshai bad jingiasyllok da ki stad ki jhad halor ka jingpang rabies ba kynthup ia u Dr. N. Marbaniang, District Veterinary Officer, Dr. Lambert Syiemlieh, Dr. Freddy Nongdhar, Bernadeth Sohtun HUFAN, Andrew Umdor (SMB), bad Dr. Iada Lyngdoh, State Nodal Officer NRCP.
Lapynlong ruh ia ka jingiakop thoh poster jong ki khynnah skul ban nang kyntiew ia ka jingtip shaphang ki lad jingiada ia ka jingpang rabies.
La pynlong ruh ia ka prokram kyrpang ban leit kam bad ai injek ia ki ksew surok, da ka jingthmu ban khanglad ia ka jingsaphriang ka jingpang rabies hapoh ka shnong ka thaw.
