Nongpoh, Jylliew 10 : Ka seng HITO-Nongpoh Umden Area, hynne ka sngi Nyngkong, kala pakhang ia ka surok Nongpoh-Umden-Sonapur, kum ka dak ban kyrshan ia ka Kong Bindas Syiem kaba shah thngan ha Shillong.
Ka HITO kala pakhang lynti ia kane ka surok naduh ka por 6 baje mynstep hynne ka 10 tarik Jylliew bad kan bteng haduh ka por 6 baje mynstep jong ka 11 tarik Jylliew. Kala pyntip ruh ba kan ym shah satia ia kino kino ki kali ba kin iaid lait noh tang ki kali kit nongpang.
Ia kane ka pakhang surok ba 24 kynta la kyrshan ruh da ki kynhun ki Nongniah kali, ki paidbah lem bad kiwei kiwei ki Sengbhalang.
Haba kren sha ki lad pathai khubor, u President ka HITO Nongpoh, Umden Area samla Marius Malai ula iathuh ba ia kane ka sienjam la shim kum shibynta ban ai jingkyrshan ia ka kong Bindas Syiem, kaba la mih shakhmat ban shah thngan ha kaban dawa ia ka surok uba ki paidbah ki donkam palat.
Ha kane ka sngi, ka HITO kala thang ruh ia ki tyngshop jong u Myntri Rangbah ka Jylla, Symbud Myntri Rangbah ka Jylla bad jong u MLA ka Nongpoh constituency.
