Guwahati, Kyllalyngkot 25: Ha ka jingpynbna ia ki nongioh ia ka khusnam Padma Awards 2026 shi sngi shwa ban rakhe ia ka Republic Day ha ka ri, ki riewshimet na ka thain shatei lammihngi kila ioh jingithuh ha ka ri ha ka jingnoh synniang ha ka Art & Culture, ka rep ka riang, ka jingnoh synniang ia ka imlang sahlang bad ka jingtrei ia ki kam bapher ha ka jingim.
Ka Sorkar Pdeng kala mynjur ia ki 131 ngut ban ioh pdiang ia ka Padma Awards mynta u snem kaba kynthup ia ki 5 ngut kiban ioh ia ka Padma Vibhushan, 13 ngut ia ka Padma Bhushan bad 113 ia ka Padma Shri, katkum ka kyrwoh kaba la phah da ka Ministry of Home Affairs. Ki don 10 ngut ki riewshimet na ki jylla jong ka thain shatei lammihngi kiba la shah pynkhamti ban ioh ia ka khusnam Padma Shri, kaba kynthup ruh ia ki 2 ngut kiba la khlad noh.
Ka jingsam ia ka Padma Award ha ka ri India kadei ka khusnam kaba heh tam bad la sam ia ka ha ki 3 tylli ki bynta, ka Padma Vibhushan kaba dei ka jingai jingshakri kaba kham phylla, ka Padma Bhushan kadei na ka bynta ka jingai jingshakri ha ki kyrdan kiba heh bad ka Padma Shri kadei na ka bynta ka jingai jingshakri ha kino kino ki bynta.
Ha kane ka thup kyrteng kaba mynta u snem, ka kynthup ruh ia ki nongioh khusnam kiba na ka jylla Assam, Arunachal Pradesh, Meghalaya, Nagaland, Tripura bad Manipur, kaba pyni ia ka jingpaw ki kam ha ka ri, kiba la trei ha ki shnong ki thaw, ka jingstad tynrai jong ki riewlum bad ka kolshor tynrai jong ka thain shatei lammihngi.
Na Meghalaya, u Bah Hally War ula ioh ia ka Padma Shri ha ka jingtrei mon sngewbha, ha kaba la ai jingithuh halor ka jingtrei kaba shi lynter ka jingim ka jongu ban pynneh pynsah ia ka jingkieng diengjri, kaba dei ka nuksa kaba phylla ban iada ia ka mariang bad kumjuh kaba la tip kum ka Bio-Engineered Heritage.
Na ka Jylla Assam, u Haricharan Saikia bad Nuruddin Ahmed kila ioh ia ka Padma Shri ha kaba iadei bad ka Art, ha kaba la ai jingithuh ia ka jingtrei borbah ka jongki ban noh synniang ha kaba iadei bad ka jinglong jingman jong ka Arts & Culture hapoh ka jylla Assam.
U Ahmed uba long u director ba pawnam, art director, set bad costume designer, ula pawkhmat bha ha ka jylla Assam bad wanrah ia ki jingialang heh bad ia ki rynsan kiba heh ha kane ka jylla ban kyntiew bad pynneh ia ka kolshor ki Assamese wat hapdeng ka jingbym biang ia ki jingdon jingem.
U Jogesh Deuri ula ioh ia ka burom ha ka liang ka rep ka riang naka bynta ki kam kiba iadei bad ka kam thain jingthain ne sericulture.
U nongialam sain pyrthei bad u Myntri barim ka Sorkar Pdeng u Kabindra Purkayastha uba la khlad noh ula ioh ia ka khusnam Padma Shri halor ka jingnoh synniang ha ka kam shakri paidbah, da kaba ai jingithuh ia ki kam kiba ula leh hapoh ka ri bad ha ki bynta ban wanrah ia ka roi ka par.
Na ka Jylla Arunachal Pradesh, u Techi Gubin ula ioh ia ka Padma Shri na ka bynta ka jingtrei mon sngewbha ha ka imlang sahlang, u nongiada ia ka jaidbynriew Nyishi uba la trei borbah ban pynneh ia ka jingngeit tynrai bad ia ki riti dustur da kaba ialam ia kane ka jaidbynriew sha palat 90 tylli ki shnong kiba don ha khappud bad kila odn ruh ki khep ba kila leit ban pynieng ia ka lama jong ka ri India.
U Sangyusang S Pongener na ka jylla Nagaland ula ioh ia ka khusnam ha kaba iadei bad ka Art halor ka jingtrei met bad mynsiem ha ka jingim ban pynneh pynsah bad ban kyntiew ia ki riti dustur jong ki jaidbynriew Naga, ban pynlong ia ki kiba im lyngba ki jingak drama bad lyngba ki jingrwai.
Na ka Jylla Manipur, u Yumnam Jatra Singh uba la khlad noh ula ioh ia ka Padma Shri ha ka Art. U Master jongka Nata Sankirtana, ula aiti iala ka jingim ha ka jingtem jingput tynrai ha ka kolshor ki Manipuri.
