Ot ribbon u Scindia ia ka jingpynher ia 3 tylli ki liengsuin kamai ha ki 5 tylli ki Nongbah kynthup ka Shillong

Shillong, Risaw 30 : U Myntri ka Tnad Civil Aviation Jyotiraditya M Scindia lem bad u Myntri Khynnah Gen Dr Vijay Kumar Singh, kila ot ribbon ia ka jingpynher haduh 3 tylli ki liengsuin kamai sha ki 5 tylli ki Nongbah jong ka thain Shatei Lam Mihngi ka Ri.
Kine ki Nongbah ki dei jong ka Jylla Assam, Arunachal Pradesh, Meghalaya, Manipur bad Mizoram.

Ka jingpynbun ia ki liengsuin ha kine ki Nongbah jong kine ki san tylli ki Jylla kan iarap shibun ban pynsuk ia ka jingim jong ki Nongshongshnong ka thain bad kan iarap ruh ban kyntiew ia ki kam jngohkai bad ka khaii ka pateng.

Haba kren plie, u Scindia ula ai khublei ia ki paid nongshongshnong ka thain bad ong ba mynta ka sngi ka dei ka sngi sah kynmaw ba ka Sorkar Pdeng kala shim ia ka sienjam kaba khraw ha kaban pynbiang ia ki lad pyniasoh na suin ha baroh ki jaka jong ka Ri.

U Myntri ula pyntip ruh ba ka sorkar pdeng kala pynleit jingmut kongsan eh ha ki lad pyniasoh na suin hapoh ka thain Shatei Lam Mihngi haba iathuh ba ha kine ki phra snem, ka sorkar kala dep ban shna haduh hynniew tylli ki lad liengsuin ha ka thain.

Hapoh ka UDAN Scheme, 14% ki lynti iaid la ai sha ka thain Shatei Lam Mihngi katba ha ka UDAN 4.2, haduh 18% ki lynti iaid la ai sha ka thain, ula iathuh haba pyntip ba ka sorkar Pdeng kala buh haduh T. 500 klur ka corpus fund sha ka jingpyniasoh ia ki kad liengsuin hapoh ka thain.

U Myntri u pyntip ba hapoh ka International UDAN, artylli ki lynti iaid na Argartala-Chittagong-Agartala bad Imphal-Mandalay-Imphal kin sa treikam noh.

U Myntri Khynnah Dr Vijay Kumar Singh ula ong ba ka dei ka jingkmen kaba khraw ba la lah ban wanrah shuh shuh ia ki lad pyniasoh na suin sha ki Jylla ka thain Shatei Lam Mihngi. Kane kan iarap ia ki nongleit nongwan na kawei ka Jylla sha kawei pat.

Ia kine ki liengsuin yn pyniaid da ka Alliance Air bad kin iaid kat kum kane ka jingbuhpor.

IMPHAL-AIZAWL-IMPHAL (UNDER RCS UDAN): 30TH OCTOBER 2022

LILABARI-ZIRO-LILABARI: 30th OCTOBER 2022

SHILLONG-LILABARI-SHILLONG (UNDER RCS UDAN): 31st OCTOBER 2022

Kiba la iashimbynta ha kane ka jingialang ot ribbon ki kynthup ia u Pema Khandu Myntri Rangbah ka Arunachal Pradesh, N. Biren Singh Myntri Rangbah ka Manipur,Hemanta Biswa Sarma Myntri Rangbah ka Assam, Conrad Sangma Myntri Rangbah ka Meghalaya (bala phah da ka video message), u Kiren Rijiju Myntri ka Sorkar Pdeng ba khmih ia ka Tnad Law and Justice, nalor kiwei kiwei ki Myntri Sorkar bad ki MP na kine ki Jylla.