Shillong, Nailur 08 : U Myntri ka tnad Bording Abu Taher Mondal ha ka sngi Thohdieng, ula ong ba ka kaiphod ba dang shu leh malu mala (preliminary report) bala aiti da ka Indian Institute of Technology Guwahati (IITG), kala pynpaw baka Jingkieng Umiam ka dang biang bha hynrei yn hap ban kylliang tang ia ki bearing khnang ba kan kyrda kham slem.
Haba iakren bad ki nongthoh khubor, u Mondal ula ong ba ka IITG kala dep ban wan jurip ia ka jingkieng Umiam bad ka Tnad ka dang ap mynta ban ioh ia ka kaiphod ba pura.
“Kat kum ka kaiphod ba dang pynkhreh malu mala, kila pyntip ba ka Jingkieng ka dang biang bha hynrei ia ki bearing jong ka jingkieng la hap ban kylliang noh. Namar kata, ngi la buh ia ka order sha ka kompani kaba shna ia kine ki bearing bad ngi la thung ruh ia ka kynhun ba paw bha ban leh ia kane ka kam” ula ong.
U Myntri ula pyntip ruh ba ka Sorkar kala thung ia ka Joint Committee hapdeng ki Engineer ka Meghalaya Energy Corporation Limited (MeECL) bad ka Public Works Department (PWD), ba kan bishar ia ka jingtyrwa ban nang tei pynkhlain ia ka jingkieng Umiam.
“Shen kin sap hah ia ka kaiphod jong ki bad hadien kane kin sa iakren hapdeng jong ki bad lehse ha ka Kynhun Myntri ba kumno ngin pyniaid shakhmat ia ka kam. Baroh kiei kiei kila biang lut, ngin sab uh ia ka tarik” ula ong.
U Myntri ula ong ba shuwakane, yn sa pyntip sha ki paidbah ba ha kano re kano ka sngi, yn sa rah ia ka jingkieng ban kylliang ne bujli ia ki bearing.
“Ki kam hi kila iaid ha ka lynti kaba dei bad ha ka sngi ba kylliang ia ki bearing, yn sa khang ia ka jingiaid jong ki kali lyngba kane ka jingkieng,ka ban long haduh 8 kynta. Hadien ka 8 kynta, tang ki kali rit yn sa shah ban iaid kata hadien bala pynhiar biang ia ka jingkieng” ula ong ba ha ka por ba dang rah ia ka jingkieng, yn ym shah ia kano kano ka kali ruh ba kan iaid lyngba ka jingkieng.
